'जलयुक्त विद्यापीठ' उपक्रम आदर्शवत: जिल्हाधिकारी डॉ. अमित सैनी

 शिवाजी विद्यापीठाच्या भाषा भवन तलावाची कुलगुरू डॉ. देवानंद शिंदे यांच्यासमवेत पाहणी करताना जिल्हाधिकारी डॉ. अमित सैनी, कोल्हापूर महापालिकेचे आयुक्त पी. शिवशंकर आणि जिल्हा परिषदेचे मुख्य कार्यकारी अधिकारी कुणाल खेमनार.

 शिवाजी विद्यापीठातील पुनरुज्जिवित शिंदे विहीरीनजीक जिल्हाधिकारी डॉ. अमित सैनी, कोल्हापूर महापालिकेचे आयुक्त पी. शिवशंकर आणि जिल्हा परिषदेचे मुख्य कार्यकारी अधिकारी कुणाल खेमनार.

 शिवाजी विद्यापीठात निर्माण करण्यात आलेल्या शेततळ्यांची  कुलगुरू डॉ. देवानंद शिंदे व अन्य अधिकाऱ्यांसमवेत पाहणी करताना जिल्हाधिकारी डॉ. अमित सैनी, कोल्हापूर महापालिकेचे आयुक्त पी. शिवशंकर आणि जिल्हा परिषदेचे मुख्य कार्यकारी अधिकारी कुणाल खेमनार.

 शिवाजी विद्यापीठाच्या संगीत अधिविभागाशेजारच्या तलावाची कुलगुरू डॉ. देवानंद शिंदे व अन्य अधिकाऱ्यांसमवेत पाहणी करताना जिल्हाधिकारी डॉ. अमित सैनी, कोल्हापूर महापालिकेचे आयुक्त पी. शिवशंकर आणि जिल्हा परिषदेचे मुख्य कार्यकारी अधिकारी कुणाल खेमनार.

कोल्हापूरचे जिल्हाधिकारी डॉ. अमित सैनी, कोल्हापूर महापालिकेचे आयुक्त पी. शिवशंकर आणि जिल्हा परिषदेचे मुख्य कार्यकारी अधिकारी कुणाल खेमनार यांनी शिवाजी विद्यापीठाच्या प्रांगणातील भव्य शिवपुतळ्याचे दर्शन घेतले.

शिवाजी विद्यापीठाच्या प्रांगणात बहरलेल्या पुष्पवैभवात रमलेले कोल्हापूरचे जिल्हाधिकारी डॉ. अमित सैनी, कोल्हापूर महापालिकेचे आयुक्त पी. शिवशंकर आणि जिल्हा परिषदेचे मुख्य कार्यकारी अधिकारी कुणाल खेमनार. सोबत कुलगुरू डॉ. देवानंद शिंदे, प्रभारी कुलसचिव डॉ. व्ही.एन. शिंदे, बीसीयुडी संचालक डॉ. डी.आर. मोरे व परीक्षा नियंत्रक महेश काकडे.

कोल्हापूर, दि. ३१ ऑगस्ट: शिवाजी विद्यापीठाने दुष्काळाच्या पार्श्वभूमीवर राबविलेली 'जलयुक्त आवार' ही मोहीम अत्यंत आदर्शवत आहे. या महत्त्वपूर्ण उपक्रमासाठी जिल्हा प्रशासनाचे विद्यापीठाला नेहमीच सहकार्य राहील, असे प्रतिपादन जिल्हाधिकारी डॉ. अमित सैनी यांनी आज येथे केले.

एका बैठकीच्या निमित्ताने जिल्हाधिकारी डॉ. सैनी यांच्यासह कोल्हापूर महानगरपालिकेचे आयुक्त पी. शिवशंकर आणि जिल्हा परिषदेचे मुख्य कार्यकारी अधिकारी कुणाल खेमनार विद्यापीठात आले होते. बैठकीनंतर त्यांनी विद्यापीठाने केलेल्या जलसंधारण कामे पाहण्याची इच्छा व्यक्त केली. त्यानुसार कुलगुरू डॉ. देवानंद शिंदे, प्रभारी कुलसचिव डॉ. व्ही.एन. शिंदे, बीसीयुडी संचालक डॉ. डी.आर. मोरे, परीक्षा नियंत्रक महेश काकडे आदी अधिकाऱ्यांसह त्यांनी विद्यापीठ कॅम्पसमधील जलसंधारण कामांची पाहणी केली. यामध्ये वि.स. खांडेकर भाषा भवनानजीकचा तलाव, नव्याने निर्माण केलेली तीन शेततळी, पूर्णतः पुनरुज्जिवित केलेली शिंदे विहीर आणि संगीत अधिविभागाशेजारचा तलाव या ठिकाणी भेट देऊन पाहणी केली. सर्वच अधिकाऱ्यांनी विद्यापीठाला लाभलेल्या निसर्गसौंदर्याचे आणि ते जपण्यासाठी विद्यापीठ करत असलेल्या प्रयत्नांचे मनापासून कौतुक केले.

दरम्यान, शिवाजी विद्यापीठाच्या क्रीडा अधिविभागाशेजारच्या मैदानावर सध्या विविधरंगी पुष्पवैभव बहरले आहे. ती फुले पाहून या अधिकाऱ्यांनाही या फुलांचे जवळून दर्शन घेण्याचा मोह आवरला नाही. कॅम्पसभर पसरलेली रंगीबेरंगी फुलांची पखरण पाहून साऱ्यांचेच मन प्रसन्न झाले. या नैसर्गिक वातावरणात सर्वच अधिकाऱ्यांनी आनंदाचे दोन क्षण अनुभवले. येथे छायाचित्र काढून घेण्याचा मोह त्यांना आवरला नाही.

त्यानंतर छत्रपती शिवाजी महाराजांच्या भव्य पुतळ्याचे दर्शन घेताना पुन्हा हे सर्वच अधिकारी भारावून गेले. या शिवपुतळ्याचे इतक्या जवळून दर्शन घेताना अंगावर रोमांच उभे राहिल्याची भावना जिल्हाधिकाऱ्यांनी व्यक्त केली.