‘कॉमेलिनेसी ऑफ इंडिया’ संदर्भग्रंथाचे शिवाजी विद्यापीठात प्रकाशन

 

शिवाजी विद्यापीठात 'कॉमेलिनेसी ऑफ इंडिया' या संदर्भग्रंथाचे प्रकाशन करताना कुलगुरू डॉ. दिगंबर शिर्के. सोबत (डावीकडून) डॉ. मयूर नंदीकर, डॉ. रितेश कुमार चौधरी, डॉ. एस.आर. यादव आणि डॉ. राजाराम गुरव.

कोल्हापूर, दि. २१ मे: ‘कॉमेलिनेसी ऑफ इंडिया’ हा संदर्भग्रंथ वनस्पतीशास्त्राच्या भावी संशोधकांसाठी एक महत्त्वाचा ठेवा आहे. अशा प्रकारचे संशोधन व संदर्भसंचय आपल्या हातूनही व्हावा, यासाठीची प्रेरणा वनस्पतीशास्त्राच्या अभ्यासक व संशोधकांनी यापासून घ्यावी, असे आवाहन शिवाजी विद्यापीठाचे कुलगुरू डॉ. दिगंबर शिर्के यांनी केले.

शिवाजी विद्यापीठाच्या वनस्पतिशास्त्र अधिविभागाचे प्रमुख डॉ. राजाराम गुरव आणि डॉ. मयूर नंदीकर यांनी अनेक वर्षांच्या परिश्रमातून संयुक्तपणे सिद्ध केलेल्या ‘कॉमेलिनेसी ऑफ इंडिया’ अर्थात ‘केना कुळातील भारतीय वनस्पती’ या महत्त्वपूर्ण संदर्भग्रंथाचे प्रकाशन अधिविभागाच्या नीलांबरी सभागृहात नुकतेच करण्यात आले. त्यावेळी अध्यक्षस्थानावरुन कुलगुरू डॉ. शिर्के बोलत होते. कुलगुरू डॉ. शिर्के यांच्यासह एमेरिटस संशोधक प्राध्यापक डॉ. एस. आर. यादव आणि पुण्यातील आघारकर संशोधन संस्थेतील शास्त्रज्ञ डॉ. रितेश कुमार चौधरी यांच्या हस्ते या ग्रंथाचे अनावरण करण्यात आले.

कुलगुरू डॉ. शिर्के म्हणाले, सन २०१३मध्ये पीएच.डी.चे संशोधन पूर्ण केल्यानंतरही या विषयातील संशोधन जारी ठेवून डॉ. मयूर नंदीकर आणि त्यांचे मार्गदर्शक डॉ. राजाराम गुरव यांनी एक आदर्श वस्तुपाठ घालून दिला. त्यांच्या या समर्पणवृत्तीमुळेच वनस्पतीशास्त्राच्या एका शाखेमधील महत्त्वाचा संदर्भग्रंथ साकार झाला. अशा प्रकारच्या संशोधनासाठी खूप संयम लागतो तसेच वेळही द्यावा लागतो. त्याखेरीज भरीव असे संशोधन साकारणे अशक्य आहे, याची जाणीव ठेवून नवसंशोधकांनी आपल्या संशोधनकार्याला दिशा द्यावी, असेही त्यांनी सांगितले. यापुढील काळातही वनस्पतीशास्त्र अधिविभागातील संशोधकांकडून उत्तमोत्तम संशोधन साकारेल, असा विश्वास त्यांनी व्यक्त केला.

डॉ. रितेश कुमार चौधरी म्हणाले, शिवाजी विद्यापीठाच्या वनस्पतीशास्त्र अधिविभागातील संशोधकांनी वनस्पतीशास्त्राच्या संशोधनात, विशेषतः पश्चिम घाटावरील वनस्पतींच्या वेगवेगळ्या प्रजातींविषयी संशोधन, संवर्धन या अनुषंगाने मोलाचे योगदान दिले आहे. या परिसरातील संशोधनामध्ये मलाही काही वाटा उचलता आला, याचे समाधान वाटते. डॉ. एस.आर. यादव यांनी तर ‘ग्रासेस ऑफ महाराष्ट्र’ या ग्रंथाच्या रुपाने अमूल्य संशोधकीय ठेवा निर्माण करून ठेवला आहे. त्याच संशोधकीय परंपरेतून डॉ. गुरव व नंदीकर यांचा संदर्भग्रंथ साकारला आहे, असे गौरवोद्गार त्यांनी काढले.

डॉ. मयूर नंदीकर यांनी संदर्भग्रंथाची प्रस्तुतता आणि त्याचा प्रकाशनापर्यंतचा १५ वर्षांचा प्रवास सांगितला. ते म्हणाले, पारंबी प्लांट रिसर्च अँड एज्युकेशन फाऊंडेशन, पुणे यांनी प्रकाशित केलेल्या या ग्रंथात आफ्रिका आणि आग्नेय आशियातील १३१ प्रजातींसह भारतातील कोमेलिनेसी कुटुंबातील विविध प्रजातींची टीपांसह माहिती दिली आहे. त्यांची छायाचित्रे, रेखाचित्रे आणि आंतरराष्ट्रीय निसर्ग संवर्धन संघ (IUCN) यांनी दर्शविलेल्या धोक्याचे मूल्यमापन आहे. निसर्ग संवर्धनवादी, वनस्पतिशास्त्राचे विद्यार्थी आणि वनस्पतीप्रेमींसाठी म्हणून ते महत्त्वाचे ठरते. स्कॉटिश वनस्पतिशास्त्रज्ञ डॉ. हेन्री नॉल्टी (रॉयल बोटॅनिक गार्डन एडिनबरा) यांची प्रस्तावना ग्रंथास लाभली आहे, हेही याचे एक महत्त्वपूर्ण वैशिष्ट्य असल्याचे त्यांनी सांगितले.

डॉ. राजाराम गुरव यांनी या ग्रंथाच्या निर्मिती प्रक्रियेविषयी माहिती दिली. ते म्हणाले, सन १८७९मध्ये ब्रिटीश अभ्यासक आल्फ्रेड यंग यांनी पश्चिम महाराष्ट्रातून या प्रजातींमधील काहींचे संकलन केले होते आणि त्यांची माहिती ब्रिटीश म्युझियममध्ये होती. ही माहिती आजवर कधीही प्रकाशात आली नव्हती. डॉ. नंदीकर यांच्या संशोधनाद्वारे आणि आता या ग्रंथाद्वारे ती माहिती वनस्पतीशास्त्रांना उपलब्ध झाली आहे, ही फार मोठी उपलब्धी असल्याचे त्यांनी सांगितले.

यावेळी डॉ. मनोज लेखक यांनी स्वागत व प्रास्ताविक केले, तर डॉ. घाणे यांनी आभार मानले.

 

संदर्भग्रंथाची वैशिष्ट्ये:

•   प्रख्यात ब्रिटीश वनस्पतीशास्त्रज्ञ सी. बी. क्लार्क यांच्या १८८१मधील कॉमेलिनेसीवरील मोनोग्राफनंतरचे महत्त्वाचे ठळक कार्य.

•   १२ नवीन नावे आणि प्रजाती

•   १३ नवीन समानात्म प्रजाती

•   १०८ द्विपदींचे (Binomial) वर्गीकरण

•   १३१ नावांसाठी ५१६ द्विपदींची नोंद

•   केना कुळातील वनस्पती त्यांची प्रदेशनिष्ठता आणि ओळख

•   गुणसूत्रांची संख्या निश्चितीकरण

•   १०० पेक्षा जास्त रेखाचित्रे आणि छायाचित्रे

•   या लेखनासाठी जगभरातील ५० हून अधिक पादपालयाचा (herbaria) अभ्यास. त्यात लंडनचे ब्रिटिश म्युझिअम व कीव, इंग्लंड यांचा समावेश. 

शिवाजी विद्यापीठ सीमावासीय विद्यार्थ्यांच्या शैक्षणिक प्रगतीसाठी कटिबद्ध

 विद्यापीठाच्या सवलत योजनाविषयक कार्यशाळांना सीमाभागात उत्स्फूर्त प्रतिसाद

शिवाजी विद्यापीठाच्या विशेष सवलत योजनेची माहिती देण्यासाठी बेळगाव येथे आयोजित कार्यशाळेप्रसंगी विद्यापीठाच्या समिती सदस्यांसमवेत उपस्थित विद्यार्थी, पालक आणि नागरिक.

शिवाजी विद्यापीठाच्या विशेष सवलत योजनेची माहिती देण्यासाठी बेळगाव येथे आयोजित कार्यशाळा संपल्यानंतरही अधिक माहिती जाणून घेण्यासाठी विद्यार्थी, पालकांनी विद्यापीठाच्या समिती सदस्यांभोवती गर्दी केली. 

कोल्हापूर, दि. १६ मे: हीरकमहोत्सवी शिवाजी विद्यापीठ आपल्या स्थापनेपासूनच दक्षिण महाराष्ट्रासह सीमावर्ती उत्तर कर्नाटकातील मराठी भाषिक विद्यार्थ्यांच्या शैक्षणिक प्रगतीसाठी कटिबद्ध असल्याचा विश्वास विद्यापीठाच्या विशेष समितीने सीमावासियांना दिला.

कुलगुरू डॉ. दिगंबर शिर्के यांच्या संकल्पनेतून शिवाजी विद्यापीठाने गेल्या दोन वर्षांपासून महाराष्ट्र-कर्नाटक सीमाभागातील विद्यार्थ्यांसाठी विशेष सवलत योजना राबविण्यास सुरवात केली आहे. या योजनेची माहिती सीमाभागातील नागरिकांना देण्यासाठी विद्यापीठाने विशेष समिती स्थापन केली आहे. या समितीने ९ मे ते १४ मे २०२४ या कालावधीत सीमाभागातील विविध ठिकाणी विशेष कार्यशाळा घेऊन शिक्षक, विद्यार्थी, पालकांसह नागरिकांना या योजनेविषयी अवगत केले. या कार्यशाळांना सीमावासियांचा उत्स्फूर्त प्रतिसाद लाभला असून सुमारे १५० ते २०० विद्यार्थ्यांनी विद्यापीठातील विविध अभ्यासक्रमांना प्रवेश घेण्याबाबत पसंती दर्शविली आहे.

या संदर्भात सविस्तर माहिती अशी की, महाराष्ट्र-कर्नाटक सीमाभागातील ८६५ गावांतील विद्यार्थ्यांसाठी शिवाजी विद्यापीठाने शैक्षणिक प्रवेशाबाबत विशेष सवलत योजना जाहीर केली आहे. याअंतर्गत अनुदानित अभ्यासक्रमांमध्ये १० टक्के राखीव जागा तसेच या जागांमधून प्रवेश घेणाऱ्या विद्यार्थ्यांना शैक्षणिक शुल्क माफ करण्यात आले आहे. विनाअनुदानित अभ्यासक्रमांसाठी सीमावासीय वि्यार्थ्यांना शैक्षणिक शुल्क २५ टक्के माफ करणेत आले आहे. या योजनेद्वारे विद्यापीठात प्रवेशित होणाऱ्या विद्यार्थ्यांना  वसतिगृह सुविधा निश्चितपणे दिली जाईल. त्यासाठी कोणतेही शुल्क आकारण्यात येणार नाही. अर्थात वसतिगृह सुविधा मोफत असेल. अशी योजना राबवणारे शिवाजी विद्यापीठ महाराष्ट्रातील एकमेव विद्यापीठ आहे.

विद्यापीठ प्रशासनाने या योजनेचा सीमाभागात प्रचार, प्रसार आणि अंमलबजावणी प्रभावीपणे केल्यामुळे पहिल्या वर्षी ४४, तर गेल्या वर्षी ८८ अशा एकूण १३२ विद्यार्थ्यांनी या योजनेचा लाभ घेतला आहे. यंदाही सदर योजनेची माहिती देण्यासाठी निपाणी येथील देवचंद महाविद्यालय (दि. ९ मे), भालकी येथील छत्रपती शिवाजी महाविद्यालय (दि. १३ मे), खानापूर येथील शिवस्मारक आणि बेळगाव येथील संत तुकाराम सांस्कृतिक सभागृह (दोन्हीकडे दि. १४ मे) या ठिकाणी कार्यशाळांचे आयोजन करण्यात आले. विद्यापीठाच्या योजनेची माहिती देण्यासाठी नियुक्त करण्यात आलेल्या समितीमध्ये डॉ. प्रकाश पवार, डॉ. जगन कराडे, प्रा. उदय पाटील डॉ. संतोष सुतार, डॉ. कविता वड्राळे आणि डॉ. नवनाथ वळेकर यांचा समावेश होता. सर्व समिती सदस्यांनी योजनेविषयीची माहिती देऊन उपस्थितांच्या शंकांचे समाधानही कार्यशाळांमध्ये केले. या सर्व ठिकाणी असणाऱ्या महाराष्ट्र एकीकरण समितीच्या पदाधिकारी आणि सदस्यांनी कार्यशाळांत उत्स्फूर्त सहभाग घेऊन कार्यशाळांच्या व योजनेच्या यशस्वितेसाठी प्रयत्न केले. विद्यार्थी, पालकांसह नागरिकांचाही मोठा उत्स्फूर्त प्रतिसाद या कार्यशाळांना लाभला.

शिवाजी विद्यापीठासह कोल्हापूरवासीय नागरिक नेहमीच सीमावासियांच्या पाठीशी खंबीरपणे उभे आहेत. विद्यापीठाच्या या योजनेमुळे विद्यार्थी व पालकांची होणारी शैक्षणिक कुचंबणा थांबेल. त्यांना उच्चशिक्षणाच्या आणि करिअरच्या विविध संधी प्राप्त होतील, अशी भावना कार्यशाळांना उपस्थित नागरिकांनी समिती सदस्यांशी बोलताना व्यक्त केली.

बारावीनंतर विद्यापीठात शिकण्याची संधी विद्यार्थ्यांनी घ्यावी: कुलगुरू डॉ. दिगंबर शिर्के

‘स्कूल कनेक्ट अभियाना’स विद्यार्थी, पालकांचा उत्तम प्रतिसाद

शिवाजी विद्यापीठातर्फे आयोजित स्कूल कनेक्ट अभियानात मार्गदर्शन करताना कुलगुरू डॉ. दिगंबर शिर्के. मंचावर (डावीडकून) डॉ. महादेव देशमुख, प्र-कुलगुरू डॉ. प्रमोद पाटील, कुलसचिव डॉ. विलास शिंदे आणि डॉ. श्रीकृष्ण महाजन.

शिवाजी विद्यापीठातर्फे आयोजित स्कूल कनेक्ट अभियानात मार्गदर्शन करताना कुलगुरू डॉ. दिगंबर शिर्के. 

कोल्हापूर, दि. ९ मे: शिवाजी विद्यापीठात राष्ट्रीय शैक्षणिक धोरण-२०२०ची यशस्वीरित्या अंमलबजावणी करण्यात येत असून या धोरणाच्या अनुषंगाने येत्या शैक्षणिक वर्षापासून बारावीनंतर पदवी स्तरावरील अनेक अद्यावत आणि महत्त्वाचे नवे अभ्यासक्रम विद्यापीठात सुरू करण्यात येत आहेत. या अभ्यासक्रमांना प्रवेश घेऊन विद्यार्थ्यांनी आपली उज्ज्वल कारकीर्द घडविण्याच्या दिशेने वाटचाल करावी, असे आवाहन शिवाजी विद्यापीठाचे कुलगुरू डॉ. दिगंबर शिर्के यांनी आज येथे केले.

शिवाजी विद्यापीठातर्फे सन २०२४-२५ पासून बारावीनंतरचे अनेक पदवीस्तरीय अभ्यासक्रम सुरू करण्यात येत आहेत. त्या अभ्यासक्रमांची माहिती देण्यासाठी विद्यापीठाने आज दसरा चौकातील राजर्षी शाहू स्मारक भवन येथे विशेष ‘स्कूल कनेक्ट अभियाना’चे आयोजन केले. या कार्यक्रमाच्या अध्यक्षस्थानावरुन कुलगुरू डॉ. शिर्के बोलत होते. यावेळी प्र-कुलगुरू डॉ. प्रमोद पाटील प्रमुख उपस्थित होते. या कार्यक्रमाला इच्छुक विद्यार्थी, पालक आणि शिक्षक यांचा मोठा प्रतिसाद लाभला.

कुलगुरू डॉ. शिर्के म्हणाले, शिवाजी विद्यापीठामध्ये बहुतांश अभ्यासक्रम हे पदव्युत्तर स्तरावरील आहेत. महाविद्यालयातून पदवीचे शिक्षण पूर्ण केल्यानंतर पदव्युत्तर अभ्यासक्रमांसाठी विद्यापीठात प्रवेश घेता येत असे. काही वर्षांपूर्वीपासून विद्यापीठात बी.टेक. अभियांत्रिकीचे अभ्यासक्रम तंत्रज्ञान अधिविभागात सुरू आहेत. या अभ्यासक्रमाच्या विद्यार्थ्यांना नामांकित अभियांत्रिकी व सॉफ्टवेअर कंपन्यांमध्ये उत्तम पॅकेजच्या रोजगार संधी उपलब्ध झालेल्या आहेत. स्कूल ऑफ नॅनो-सायन्स अँड टेक्नॉलॉजीअंतर्गत बी.एस्सी.-एम.एस्सी. नॅनोसायन्स (पाच वर्षे एकात्मिक) अभ्यासक्रम सुरू करण्यात आला. या दोन्ही अभ्यासक्रमांना विद्यार्थ्यांचा उत्तम प्रतिसाद लाभत आहे. नॅनो-सायन्सचे तर अनेक विद्यार्थी-विद्यार्थिनी शिक्षण पूर्ण करून आता परदेशामध्ये पीएच.डी. संशोधनासह विविध आंतरराष्ट्रीय संशोधन प्रकल्पांवर काम करीत आहेत. आता त्यापुढे जाऊन राष्ट्रीय शैक्षणिक धोरण-२०२० अंतर्गत शिवाजी विद्यापीठ नवीन व अद्यावत अभ्यासक्रम सुरू करीत आहे. सन २०२४-२५ या शैक्षणिक वर्षापासून बारावीनंतरचे बी.ए. स्पोर्ट्स, बी.ए. फिल्म मेकिंग, बी.कॉम. बँकिंग अँन्ड फायनान्स, बी.एस्सी.-एम.एस्सी. इकॉनॉमिक्स (पाच वर्षे एकात्मिक), बी.सी.ए., बी.एस्सी.-एम.एस्सी. (आर्टिफिशियल इंटेलिजन्स अँड मशीन लर्निंग), बी.एस्सी.-बी.एड. (चार वर्षे एकात्मिक) आणि एम.बी.ए. (एकात्मिक चार वर्षे) हे अभ्यासक्रम सुरू करीत आहे. विद्यापीठाच्या ऑनलाईन व दूरस्थ शिक्षण केंद्रामार्फतही ऑनलाईन एम.बी.ए. सह इतरही अनेक महत्त्वपूर्ण अभ्यासक्रम राबविण्यात येत आहेत. या अभिनव अभ्यासक्रमांसाठी विद्यापीठात प्रवेश घेऊन विद्यार्थ्यांनी आपले भवितव्य घडवावे, असे आवाहन त्यांनी केले.

यावेळी प्र-कुलगुरू डॉ. प्रमोद पाटील यांच्यासह डॉ. किरणकुमार शर्मा (बी.एस्सी.-एम.एस्सी.-नॅनोसायन्स व तंत्रज्ञान), डॉ. कविता ओझा (बी.सी.ए. आणि बी.एस्सी.-एम.एस्सी. आर्टिफिशिअल इंटेलिजन्स व मशीन लर्निंग), डॉ. शिवलिंगप्पा सपली (बी.टेक.), डॉ. चेतना सोनकांबळे (बी.एस्सी.-बी.एड.), डॉ. विद्या कट्टी (बी.एस्सी.-एम.एस्सी. इकॉनॉमिक्स), डॉ. शिवाजी जाधव (बी.ए. फिल्म मेकिंग), डॉ. शरद बनसोडे (बी.ए.-स्पोर्ट्स), डॉ. आण्णासाहेब गुरव (बी.कॉम. बँकिंग अँड फायनान्स) व एम.बी.ए. (४ वर्षे एकात्मिक) आणि डॉ. डी.के. मोरे यांनी ऑनलाईन व दूरस्थ शिक्षण केंद्राच्या बी.ए. व बी.कॉम. अभ्यासक्रमांबाबत माहिती देऊन शंकासमाधान केले.

कार्यक्रमात सुरवातीला मानव्यशास्त्र विद्याशाखेचे अधिष्ठाता डॉ. महादेव देशमुख यांनी स्वागत व प्रास्ताविक केले. वाणिज्य व व्यवस्थापन विद्याशाखेचे अधिष्ठाता डॉ. श्रीकृष्ण महाजन आणि विज्ञान व तंत्रज्ञान विद्याशाखेच्या अधिष्ठाता डॉ. सरिता ठकार यांनी राष्ट्रीय शैक्षणिक धोरण-२०२० या अनुषंगाने उपस्थितांना अवगत केले. अभिजीत लिंग्रस यांनी सूत्रसंचालन केले, तर कुलसचिव डॉ. विलास शिंदे यांनी आभार मानले.

 

लेखनशिस्त व वेळेचे व्यवस्थापन ही डॉ. विलास शिंदे यांची वैशिष्ट्ये: कुलगुरू डॉ. दिगंबर शिर्के

 मराठी विज्ञान परिषदेच्या सुधाकर आठले पुरस्काराबद्दल प्रशासनातर्फे गौरव

मराठी विज्ञान परिषदेचा सुधाकर आठले पुरस्कार मिळाल्याबद्दल कुलसचिव डॉ. विलास शिंदे यांचा शिवाजी विद्यापीठ प्रशासनातर्फे गौरव करताना कुलगुरू डॉ. दिगंबर शिर्के. सोबत प्र-कुलगुरू डॉ. प्रमोद पाटील, डॉ. श्रीकृष्ण महाजन, डॉ. सरिता ठकार, वित्त व लेखाधिकारी डॉ. सुहासिनी पाटील, डॉ. महादेव देशमुख, डॉ. प्रकाश गायकवाड यांच्यासह अधिकारी.

कोल्हापूर, दि. ४ मे: लेखनाची शिस्त आणि वेळेचे व्यवस्थापन या वैशिष्ट्यांच्या बळावरच शिवाजी विद्यापीठाचे कुलसचिव तथा विज्ञानलेखक डॉ. विलास शिंदे यांना लेखनसातत्य टिकविणे शक्य झाले. त्यामुळेच मराठी विज्ञान परिषदेच्या प्रतिष्ठेच्या पुरस्काराचे ते मानकरी ठरले, असे गौरवद्गार शिवाजी विद्यापीठाचे कुलगुरू डॉ. दिगंबर शिर्के यांनी काल येथे काढले.

मराठी विज्ञान परिषदेतर्फे समाजात विज्ञान प्रसार तसेच वैज्ञानिक दृष्टीकोन रुजविण्याकरिता किमान दहा वर्षे विविध प्रकारे कार्य करणाऱ्या, पण ६० वर्षांपेक्षा कमी वय असलेल्या व्यक्तीला सुधाकर उद्धवराव आठले पुरस्कार देऊन गौरविले जाते. सन २०२४साठीचा हा पुरस्कार डॉ. विलास शिंदे यांना नुकताच मुंबई येथे परिषदेच्या ५८व्या वर्धापन दिन सोहळ्यात प्रदान करण्यात आला. त्या निमित्ताने आज विद्यापीठ प्रशासनाच्या वतीने कुलगुरू डॉ. शिर्के यांच्या हस्ते शाल, श्रीफळ, पुष्पगुच्छ व ग्रंथभेट देऊन डॉ. शिंदे यांचा सत्कार करण्यात आला. त्यावेळी ते बोलत होते.

कुलगुरू डॉ. शिर्के म्हणाले, डॉ. विलास शिंदे यांची कार्यनिष्ठा कौतुकास्पद आहे. जबाबदारीचे कार्यालयीन प्रशासकीय कामकाज सांभाळून त्यापलिकडे व्यक्तीगत वेळ लेखनासाठी काढणे हे फार कष्टाचे आहे. त्यामधील सातत्य सांभाळणे ही तर फारच जिकीरीची बाब असते. मात्र, डॉ. शिंदे यांनी त्या संदर्भात जोपासलेले सातत्य महत्त्वाचे आणि सर्वांसाठीच आदर्शवत स्वरुपाचे आहे.

प्र-कुलगुरू डॉ. प्रमोद पाटील म्हणाले, डॉ. शिंदे यांच्यावर प्रशासनातल्या वेगवेगळ्या महत्त्वाच्या जबाबदाऱ्या आल्या. त्या यशस्वीरित्या सांभाळत असताना त्याच्या बरोबरीने आपले विज्ञानलेखनावरील प्रेम त्यांनी सांभाळले. लेखनातील नियमितता आणि ताज्या विषयांच्या अनुषंगाने संदर्भ संशोधन आणि सर्वसामान्य लोकांना समजेल अशा सोप्या शब्दांत त्यांचे विश्लेषण करण्याची हातोटी त्यांना साधलेली आहे. हे समाज प्रबोधनाचे काम त्यांनी या पुढेही चालू ठेवावे, अशी अपेक्षा त्यांनी व्यक्त केली.

वाणिज्य व व्यवस्थापन विद्याशाखेचे अधिष्ठाता डॉ. श्रीकृष्ण महाजन यांनी डॉ. शिंदे यांची सर्जनशीलता वाखाणण्याजी असल्याचे सांगितले. यावेळी जनसंपर्क अधिकारी डॉ. आलोक जत्राटकर यांनीही मनोगत व्यक्त केले. कार्यक्रमाचे प्रास्ताविक व सूत्रसंचालन उपकुलसचिव गजानन पळसे यांनी केले. यावेळी विद्यापीठाच्या वित्त व लेखाधिकारी डॉ. सुहासिनी पाटील, मानव्यशास्त्र विद्याशाखेचे अधिष्ठाता डॉ. महादेव देशमुख, विज्ञान व तंत्रज्ञान विद्याशाखा अधिष्ठाता डॉ. सरिता ठकार यांच्यासह प्रशासकीय अधिकारी मोठ्या संख्येने उपस्थित होते.