निष्ठा, प्रामाणिकपणाच्या बळावर डॉ. शिंदे कुलसचिवपदाचा लौकिक उंचावतील: कुलगुरू डॉ. शिर्के

 शिवाजी विद्यापीठात नूतन कुलसचिवांचे स्वागत

शिवाजी विद्यापीठाचे नूतन कुलसचिव डॉ. विलास शिंदे यांचे प्रशासनाच्या वतीने औपचारिक स्वागत करताना कुलगुरू डॉ. दिगंबर शिर्के, प्र-कुलगुरू डॉ. प्रमोद पाटील यांच्यासह अधिकारी.

कोल्हापूर, दि. ३१ ऑगस्ट: मातृसंस्थेप्रती निष्ठा आणि प्रामाणिकपणा या गुणांच्या बळावर डॉ. विलास शिंदे शिवाजी विद्यापीठाच्या कुलसचिव पदाचा लौकिक उंचावतील, असे प्रतिपादन कुलगुरू डॉ. दिगंबर शिर्के यांनी आज येथे केले.

शिवाजी विद्यापीठाचे नूतन कुलसचिव यांचे आज विद्यापीठ प्रशासनाच्या वतीने औपचारिक स्वागत करण्यात आले. त्यावेळी अध्यक्षपदावरुन ते बोलत होते. प्र-कुलगुरू डॉ. प्रमोद पाटील प्रमुख उपस्थित होते.

कुलगुरू डॉ. शिर्के म्हणाले, विद्यापीठाचे विद्यार्थी असलेल्या डॉ. शिंदे यांनी येथे शिक्षक, प्रशासकीय अधिकारी म्हणून काम करीत आज कुलसचिव पदापर्यंत मजल मारली आहे, ही अतिशय अभिमानास्पद बाब आहे. या पदावरील व्यक्तीकडून वरिष्ठांसह सर्व घटकांच्या अपेक्षा असतात. त्यासाठी तारेवरची कसरत करावी लागत असते. मात्र, डॉ. शिंदे हे त्यांच्या अनुभवाच्या बळावर त्यांची कारकीर्द संस्मरणीय बनवतील, याची खात्री वाटते. विद्यापीठाच्या सर्व घटकांचे त्यांना या कामी सहकार्य लाभेल, अशी अपेक्षाही त्यांनी व्यक्त केली.

प्र-कुलगुरू डॉ. पाटील म्हणाले, डॉ. शिंदे यांची कामावरील निष्ठा उल्लेखनीय आहे. विद्यापीठ नेहमीच त्यांच्या प्राधान्यक्रमावर सर्वोच्च स्थानी असते. त्यांच्या या निष्ठेचेच फलित म्हणून त्यांना कुलसचिव पद भूषविण्याचा सन्मान लाभला आहे. ते या संधीचे निश्चितपणे सोने करतील.

सत्काराला उत्तर देताना कुलसचिव डॉ. विलास शिंदे म्हणाले, विद्यापीठात उपकुलसचिव पदावर काम करीत असताना जलसंवर्धन, वृक्षसंवर्धन असे व्यक्तीगत प्राधान्याचे विषय घेऊन काम करीत आलो. मात्र, कुलसचिव पदाच्या कारकीर्दीत संस्थात्मक कामे ही सर्वोच्च प्राधान्याचा विषय असतील. त्यामध्ये उपरोक्त कामांचाही समावेश असेल. कुलगुरू डॉ. शिर्के, प्र-कुलगुरू डॉ. पाटील यांनी ही जबाबदारी सोपवून जो एक विश्वास दाखविला आहे, तो सार्थ करण्याचा प्रयत्न राहील. त्यासाठी सर्व घटकांचे सहकार्य लाभणे फार महत्त्वाचे असून सर्वांना सोबत घेऊन विद्यापीठ हितासाठी काम करीत राहीन, याची ग्वाही त्यांनी या प्रसंगी दिली.

तत्पूर्वी, कुलगुरू डॉ. शिर्के यांच्या हस्ते शाल, श्रीफळ व ग्रंथभेट प्रदान करून विद्यापीठ प्रशासनाच्या वतीने नूतन कुलसचिव डॉ. शिंदे यांचे स्वागत करण्यात आले. मानव्यशास्त्र विद्याशाखेचे अधिष्ठाता डॉ. महादेव देशमुख यांनी यावेळी स्वागत व प्रास्ताविक केले. आस्थापना विभागाचे उपकुलसचिव डॉ. वैभव ढेरे यांनी आभार मानले. व्यवस्थापन परिषद सभागृहात झालेल्या या कार्यक्रमास विज्ञान व तंत्रज्ञान विद्याशाखेच्या अधिष्ठाता डॉ. सरिता ठकार, परीक्षा व मूल्यमापन मंडळाचे संचालक डॉ. अजितसिंह जाधव, वित्त व लेखाधिकारी डॉ. सुहासिनी पाटील, तंत्रज्ञान अधिविभागाचे संचालक डॉ. एस.एन. सपली, विद्यार्थी विकास विभागाचे प्रभारी संचालक डॉ. प्रकाश गायकवाड, क्रीडा संचालक डॉ. शरद बनसोडे, आजीवन अध्ययन केंद्राचे संचालक डॉ. रामचंद्र पवार, राष्ट्रीय सेवा योजना संचालक डॉ. तानाजी चौगुले यांच्यासह प्रशासकीय अधिकारी व कर्मचारी मोठ्या संख्येने उपस्थित होते.

डॉ. विलास शिंदे शिवाजी विद्यापीठाचे नूतन कुलसचिव

 

शिवाजी विद्यापीठाचे नूतन कुलसचिव डॉ. विलास शिंदे यांना नियुक्तीचे पत्र प्रदान करताना कुलगुरू डॉ. दिगंबर शिर्के व प्र-कुलगुरू डॉ. प्रमोद पाटील. शेजारी उपकुलसचिव डॉ. वैभव ढेरे.

कोल्हापूर, दि. २९ ऑगस्ट: शिवाजी विद्यापीठाचे उपकुलसचिव डॉ. विलास नेताजी शिंदे यांची आज शिवाजी विद्यापीठाच्या कुलसचिवपदी निवड करण्यात आली. शिवाजी विद्यापीठाचे ते ११ वे कुलसचिव आहेत. कुलगुरू डॉ. दिगंबर शिर्के आणि प्र-कुलगुरू डॉ. प्रमोद पाटील यांनी डॉ. शिंदे यांना आज नियुक्तीचे पत्र प्रदान केले आणि त्यांचे अभिनंदन करून भावी कारकीर्दीसाठी शुभेच्छा दिल्या.

डॉ. विलास शिंदे यांना प्रशासकीय कामकाजाचा प्रदीर्घ अनुभव असून त्यांनी नांदेड येथील स्वामी रामानंद तीर्थ मराठवाडा विद्यापीठाचे सन २०१० ते २०१२ या कालावधीत कुलसचिवपद भूषविले आहे. शिवाजी विद्यापीठाचे प्रभारी कुलसचिव म्हणूनही त्यांनी आपल्या प्रशासकीय कामकाजाचा ठसा उमटविलेला आहे. शिवाजी विद्यापीठाच्या सोलापूर येथील पदव्युत्तर शिक्षण केंद्रासह विद्यापीठाच्या विविध विभागांचे उपकुलसचिव म्हणून कामकाज पाहिले आहे. सध्या ते सभा व निवडणुका आणि उद्यान या विभागांसह प्रभारी कुलसचिव पदाचे कामकाजही पाहात होते. तत्पूर्वी, बारामती येथील तुळजाराम चतुरचंद महाविद्यालय आणि शिवाजी विद्यापीठाचा पदार्थविज्ञान अधिविभाग येथे ते पदार्थविज्ञान शास्त्राचे पाच वर्षे अधिव्याख्याता होते. डॉ. शिंदे हे शिवाजी विद्यापीठाचे विद्यार्थी असून एम्.एस्सी. (भौतिकशास्त्र) परीक्षेत शिवाजी विद्यापीठात सर्वप्रथम आले होते. क्रायोजेनिक्स विषयातील विकासात्मक संशोधनासाठी प्रा. एम्.सी. जोशी पुरस्काराचे ते सहमानकरी आहेत.

वृक्षलागवड आणि वृक्षसंवर्धन हे त्यांचे जिव्हाळ्याचे विषय असून शिवाजी विद्यापीठ जलयुक्त होण्याच्या दिशेने त्यांनी विशेष प्रयत्न केलेले आहेत. विज्ञान साहित्यिक म्हणूनही डॉ. शिंदे लोकप्रिय असून त्यांची एककांचे मानकरी, असे घडले भारतीय शास्त्रज्ञ, हिरव्या बोटांचे किमयागार, आवर्त सारणी व मूलद्रव्यांची दुनिया आणि एककांचे इतर मानकरी ही पुस्तके प्रकाशित झाली आहेत.

त्यांना महाराष्ट्र शासनाच्या यशवंतराव चव्हाण साहित्य पुरस्कारांमधील विज्ञान साहित्यासाठीचा ‘महात्मा जोतीराव फुले पुरस्कार’ प्राप्त झाला आहे. त्याचबरोबर श्रीमती जी.डी. कुलकर्णी पारितोषिक', विकासात्मक संशोधनाबद्दल 'इंडियन क्रायोजेनिक्स कौंसिल'चे 'प्रा. एम.सी. जोशी पारितोषिक', दक्षिण महाराष्ट्र साहित्य सभेचा 'कृ.गो. सूर्यवंशी साहित्य पुरस्कार,' मिरजेच्या चैतन्य शब्दांगण साहित्य गौरव पुरस्कारांतील कै. अशोक कोरे स्मृती पुरस्कार, जलसंधारण कार्याबद्दल एन्वायर्नमेंट काँझर्वेशन अँड रिसर्च ऑर्गनायझेशन, चिखली यांचा 'वसुंधरा पुरस्कार' आणि विज्ञान प्रसारासाठी लेखन आणि कार्यासाठी इंडियन फिजिक्स असोसिएशन, पुणे यांचा मो.वा. चिपळोणकर पुरस्कार प्राप्त झाले आहेत.

“सर्व घटकांना सोबत घेऊन मातृसंस्थेचा लौकिक उंचावण्यासाठी काम करणार”

शिवाजी विद्यापीठ ही माझी मातृसंस्था असून तिचा लौकिक उंचावण्यासाठीच मी आजवर काम करीत आलो आहे. या संस्थेच्या कुलसचिव पदाची जबाबदारी ही माझ्या दृष्टीने सर्वोच्च संधी असून येथील सर्व घटकांना सोबत घेऊन या पुढील काळात काम करण्यास प्राधान्य राहील. ही संधी दिल्याबद्दल विद्यापीठाचे कुलगुरू डॉ. दिगंबर शिर्के, प्र-कुलगुरू डॉ. प्रमोद पाटील यांच्याप्रती मी कृतज्ञता व्यक्त करतो, अशी प्रतिक्रिया नूतन कुलसचिव डॉ. विलास शिंदे यांनी यावेळी व्यक्त केली.

 

मिनी मॅराथॉने स्पर्धेत 400 स्पर्धकांचा सहभाग; विजेत्यांना गौरवले

 कोल्हापूर, दि.29 ऑगस्ट - जी-20 युनिव्हर्सिटी कनेक्ट प्रोग्राम व राष्ट्रीय क्रीडा दिनाचे औचित्य साधत हॉकीचे जादुगार मेजर ध्यानचंद यांची जयंती निमित्त शिवाजी विद्यापीठाच्या क्रीडा अधिविभागामार्फत मिनी मॅराथॉन स्पर्धेचे आयोजन करण्यात आले. स्पर्धेत 400 स्पर्धकांनी सहभाग नोंदविला. यामध्ये नियमित धावपटू, खेळाडू, संशोधक विद्यार्थी, प्राध्यापक, प्रशासकीय सेवक हे मोठया उत्साहाने सहभागी झाले.

       विद्यापीठाचे कुलगुरू डॉ.दिगंबर शिर्के, प्र-कुलगुरू डॉ.प्रमोद पाटील यांच्या हस्ते विद्यापीठाच्या मुख्य प्रशासकीय भवनासमोर ध्वज दाखवून स्पर्धेस प्रारंभ झाला.आपल्या राष्ट्राच्या गौरवासाठी धावा हा संदेश घेवून मानव्यशास्त्र इमारत मार्गे धावत हे स्पर्धक मुलींचे वसतिगृह, कुलगुरू निवासस्थान, दूरशिक्षण केंद्र, क्रीडा अधिविभाग, क्रांतीवन, मुलांचे वसतिगृह, परीक्षा भवन, भाषा भवन, रसायनशास्त्र अधिविभाग, मुख्य इमारतीच्या समोरील आश्वारूढ छत्रपती शिवाजी महाराज यांच्या पुतळया समोरून राजमाता जिजाऊ बहुउद्देशीय सभागृह येथे येवून स्पर्धेची सांगता झाली.

         स्पर्धेचा निकाल पुढील प्रमाणे - मुलांमध्ये पहिला क्रमांक तुकाराम मोरे (अर्थशास्त्र), दुसरा क्रमांक विजय बाजबाळकर (बी.लीप), तिसरा क्रमांक मयुरेश हासोळकर (इतिहास), चौथा क्रमांक विठ्ठल मोटे (इंग्रजी), पाचव़ा़ क्रमांक अशुतोष हंकारे (औद्योगीक रसायनशास्त्र), मुलींमध्ये पहिल क्रमांक प्रेरणा घाडगे (तंत्रज्ञान), दुसरा क्रमांक विजया कालोले (तंत्रज्ञान), तिसरा क्रमांक प्रज्ञा पाटील (रसायनशास्त्र), चौथा क्रमांक तृप्ती इंगळे (इंग्रजी), पाचवा क्रमांक अपर्णा फाळके (वनस्पतीशास्त्र). त्याचबरोबर, अधिविभागातील शिक्षक, प्रशासकीय सेवक पुढील प्रमाणे - डॉ.सागर डेळेकर, डॉ.गजानन राशिनकर, लक्ष्मण परीट (रसायनशास्त्र), डॉ.एस.एम.पाटील (वनस्पतीशास्त्र), नितीन नाईक (सुक्ष्मजीवशास्त्र), प्रशांत जाधव (विद्यापीठ ग्राहक भांडार), डॉ.निलांबरी जगताप (मराठा इतिहास), अनुप्रीया तरवाळ (रसायनशास्त्र).

-----

मेजर ध्यानचंद यांना शिवाजी विद्यापीठात अभिवादन

 

कोल्हापूर, दि.29 ऑगस्ट - जी-20 युनिव्हर्सिटी कनेक्ट प्रोग्राम व राष्ट्रीय क्रीडा दिनाचे औचित्य साधत मेजर ध्यानचंद यांची जयंती आज शिवाजी विद्यापीठात उत्साहात साजरी करण्यात आली.

विद्यापीठाच्या मुख्य प्रशासकीय भवनामध्ये कुलगुरू डॉ.दिगंबर शिर्के आणि प्र-कुलगुरू डॉ.प्रमोद पाटील यांच्या हस्ते जागतिक खेळ विश्वातील सर्वोत्कृष्ट हॉकीचे खेळाडू मेजर ध्यानचंद यांच्या प्रतिमेस पुष्पहार अर्पण करून अभिवादन करण्यात आले.  यावेळी क्रीडा व शारीरिक शिक्षण संचालक डॉ.शरद बनसोडे, विद्यार्थी विकास विभागाचे प्रभारी संचालक डॉ.प्रकाश गायकवाड, राष्ट्रीय सेवा योजना समन्वयक डॉ.तानाजी चौगुले, आजीवन अध्यासन केंद्राचे संचालक डॉ.रामचंद्र पवार, डॉ.इरण्णा उडचण, योगेश मांगुरे-पाटील, किरण पाटील, जालंदर मेंढे, यांचेसह शिक्षक, प्रशासकीय सेवक, विद्यार्थी, विद्यार्थीनी, खेळाडू मोठया प्रमाणात उपस्थित होते.

भरडधान्य पदार्थ निर्मिती-विक्रीतही नवउद्योजकतेची संधी: कुलगुरू डॉ. दिगंबर शिर्के

 विद्यापीठातील ‘इट राइट मिलेट मेला’स तरुणाईसह नागरिकांचा उत्साही प्रतिसाद

शिवाजी विद्यापीठात 'इट राइट मिलेट मेला'अंतर्गत आयोजित विविध उपक्रमांचे उद्घाटन करताना कुलगुरू डॉ. दिगंबर शिर्के. सोबत (डावीकडून) डॉ. इरान्ना उडचान, डॉ. एस.एन. सपली, प्रभारी कुलसचिव डॉ. विलास शिंदे, प्र-कुलगुरू डॉ. प्रमोद पाटील, देवदत्त जोशी, डॉ. के.यू. मेथेकर, श्रीमती के.के. जिथा, डॉ. सुहासिनी पाटील, डॉ. महादेव देशमुख आदी.

शिवाजी विद्यापीठात 'इट राइट मिलेट मेला'अंतर्गत आयोजित भरडधान्य पदार्थ विक्री व प्रदर्शनाची पाहणी करताना कुलगुरू डॉ. दिगंबर शिर्के, प्र-कुलगुरू डॉ. प्रमोद पाटील आदी.

शिवाजी विद्यापीठात 'इट राइट मिलेट मेला'अंतर्गत आयोजित भरडधान्य पदार्थ विक्री व प्रदर्शनाची पाहणी करताना कुलगुरू डॉ. दिगंबर शिर्के, प्र-कुलगुरू डॉ. प्रमोद पाटील आदी.

शिवाजी विद्यापीठात 'इट राइट मिलेट मेला'अंतर्गत मनोरंजक ज्ञानखेळांची माहिती घेताना कुलगुरू डॉ. दिगंबर शिर्के.

कोल्हापूर, दि. २८ ऑगस्ट: भरडधान्य पदार्थ विक्री व प्रदर्शनातून विद्यार्थ्यांमधील नव-उद्योजक होण्याची क्षमता सामोरी आलेली आहे. हे क्षेत्र संधी मानून यामध्ये तरुणांनी करिअर करावे, असे आवाहन शिवाजी विद्यापीठाचे कुलगुरू डॉ. दिगंबर शिर्के यांनी आज येथे केले.

केंद्रीय आरोग्य व कुटुंब कल्याण मंत्रालयाच्या भारतीय अन्न सुरक्षा व मानक प्राधिकरण (एफ.एस.एस.ए.आय.-पश्चिम विभाग), शिवाजी विद्यापीठ, ज्युबिलंट फूड्स प्रा.लि. (डॉमिनोज्) आणि परफेट्टी व्हॅन मिले यांच्या संयुक्त विद्यमाने आंतरराष्ट्रीय भरडधान्य वर्षानिमित्त आज विद्यापीठात ‘इट राईट मिलेट मेला’ या एकदिवसीय उपक्रमांतर्गत भरडधान्य पदार्थ विक्री व प्रदर्शनाचे उद्घाटन सकाळी साडेदहा वाजता कुलगुरू डॉ. शिर्के यांच्या हस्ते व प्र-कुलगुरू डॉ. प्रमोद पाटील यांच्या प्रमुख उपस्थितीत झाले. त्यावेळी ते बोलत होते.

कुलगुरू डॉ. शिर्के म्हणाले, शारिरिक व मानसिक आरोग्य सुदृढ राहण्यासाठी युवकांनी स्थानिक भरडधान्यांचा अवलंब आपल्या आहारामध्ये करण्यास प्राधान्य दिले पाहिजे. विद्यापीठातील या प्रदर्शनामुळे विद्यार्थ्यांना नव-उद्योजक बनण्याची मोठी संधी उपलब्ध झाली आहे. भारतीय भरडधान्यांचे महत्त्व जाणून शेतकर्‍यांनी नगदी पिकांच्या मागे न लागता ही पारंपरिक पिके घेऊन देश सुजलाम् सुफलाम् करावा, यासाठी तरुणांनी प्रयत्न करावेत. पालकांनीही या धान्यांचे वेगवेगळे पोषक व चविष्ट पदार्थ बनवून मुलांना द्यावेत. जेणेकरून मुले ‘जंक फूड’च्या मागे लागून शरीराची हानी करून घेणार नाहीत.

यावेळी कुलगुरूंसह सर्व मान्यवरांनी राजमाता जिजाऊसाहेब सभागृहात ‘इट राइट मिलेट मेला’च्या अंतर्गत सुरू असलेल्या सर्व उपक्रमांची फिरून पाहणी केली. विद्यार्थ्यांनी बनविलेल्या विविध पाककृती पाहून त्यांनी त्यांच्या कल्पकतेची स्तुती केली. ही कल्पकता एका दिवसापुरती न ठेवता त्याचे व्यापक रोजगार संधीत रुपांतर करण्याचे लक्ष्य बाळगण्याचे आवाहन त्यांनी केले.

यावेळी प्रभारी कुलसचिव डॉ. विलास शिंदे, वित्त व लेखाधिकारी डॉ. सुहासिनी पाटील, विज्ञान व तंत्रज्ञान विद्याशाखा अधिष्ठाता डॉ. सरिता ठकार, वाणिज्य व व्यवस्थापन विद्याशाखा अधिष्ठाता डॉ. श्रीकृष्ण महाजन, मानव्यशास्त्र विद्याशाखा अधिष्ठाता डॉ. महादेव देशमुख, एफ.एस.एस.ए.आय.च्या पश्चिम विभागाच्या सहसंचालक श्रीमती के.के. जिथा, उपसंचालक डॉ. के.यू. मेथेकर, तंत्रज्ञान अधिविभाग संचालक डॉ. एस.एन. सपली, डॉ. प्रकाश राऊत, व्यवस्थापन परिषद सदस्य सिद्धार्थ शिंदे, फूड सायन्स अँन्ड टेक्नॉलॉजीचे विभाग प्रमुख डॉ. पी.डी. पाटील, समन्वयक डॉ. इराण्णा उडचान, एफ.एस.एस.ए.आय.च्या सहाय्यक संचालक ज्योती हर्णे, तांत्रिक संचालक देवांशी चावला यांच्यासह विद्यार्थी-विद्यार्थिनी मोठ्या संख्येने उपस्थित होते.

‘डॉमिनोज्’चा भरडधान्यांचा पिझ्झा

यावेळी ज्युबिलंट फूड्सचे व्हाईस प्रेसिडेंट (क्वालिटी एश्यूरन्स) देवेंद्र यादव यांनी पिझ्झासाठी जगप्रसिद्ध असणारा ‘डॉमिनोज्’ आज भरडधान्यांपासून बनविलेला पिझ्झा खास तयार करून सादर करीत असल्याचे सांगितले. त्याचा तरुणांनी आस्वाद घेण्याचे आवाहनही त्यांनी केले.

विद्यार्थ्यांसाठी भरडधान्याधारित ज्ञानखेळ

या मेळाव्यामध्ये उपस्थित विद्यार्थ्यांसाठी भरडधान्यांवर आधारित विविध मनोरंजक आणि ज्ञानवर्धक खेळांचे आयोजनही करण्यात आले होते. यामध्ये आरोग्याची सापशिडी आणि दोरीउड्या आदी खेळांचा समावेश होता.

विद्यार्थ्यांनी बनविल्या विविध भरडधान्य पाककृती

यावेळी विद्यापीठाच्या अन्न विज्ञान व तंत्रज्ञान अधिविभागातील विद्यार्थ्यांसह परिसरातील विविध अन्नविज्ञान महाविद्यालयांच्या विद्यार्थ्यांनी भरडधान्यांपासून अनेकविध कल्पक पाककृती सादर केल्या. बारामती येथील महाविद्यालयातील विद्यार्थी-विद्यार्थिनींनीही आपले स्टॉल प्रदर्शनात मांडले होते. भरडधान्य भेळ, शेवचाट, मिश्र भरडधान्यांचे मफिन्स, बाजरीची लापशी, पनीर, भरड टिक्की, खाकरा, उपवासाचा डोसा, नाचणीची अंबिल, नाचणीचे गुलाबजाम, नाचणी मिल्कशेक, भरडधान्य मिश्र कोल्ड कॉफी, कटलेट, भरडधान्य ढोकळा, भरड धान्य मोदक, खीर, प्रोसो कढाई पुलाव, इलेट (इटालियन+मिलेट) नुडल्स, पॅन केक्स, इन्स्टंट बाजरी खीर, बाजरी स्वीट मोमोज्, नाचणी मोमोज्, नाचणीची इडली, बाजरीचे थालीपीठ, मिश्र भरडधान्य नाचोज् व भेळ, बाजरी खाकरा चाट, मिश्र भरडधान्य कोंथीबीर वडी, नाचणीचे चोको केक, बाजरी भेळ, बाजरी कोक चॅट, बाजरी आणि राजगिरा-वरीचा मठ्ठा, बाजरीची स्मुदी, नाचणीची भाकरी, धपाटे, झुणका भाकर इत्यादी पदार्थांचे स्टॉल होते. एकूण ३५ स्टॉलवर या पदार्थांची चव चाखण्यासाठी खाद्यरसिकांची मोठी झुंबड उडाली होती.

त्याचप्रमाणे परिसरातील बचतगटांनाही भरडधान्यांसह पारंपरिक पदार्थ विक्री करण्यासाठी १५ स्टॉल उपलब्ध करून देण्यात आले होते. त्यांवर राजगिरा लाडू, शेंगदाणा चिक्की, खोबरे वडी, शेंगदाणा लाडू, तिखट पुरी , शेंगदाणा चटणी, शेंगदाणा पोळी, उडदाचे माडगं, नाचणी लाडू, उपवासाची मिसळ, उपवासाचे वरीचे थालीपिठ आणि गुळाचा चहा इत्यादी पदार्थ विक्रीसाठी उपलब्ध होते.

विविध स्पर्धांना उत्तम प्रतिसाद

‘इट राइट मिलेट मेला’मध्ये आयोजित विविध स्पर्धांना महाविद्यालयीन तसेच शालेय विद्यार्थ्यांचाही उत्तम प्रतिसाद लाभला. या विविध स्पर्धांचे विजेते पुढीलप्रमाणे:-

भरडधान्यावर आधारित स्टॉल - प्रथम संघ – भक्ती संजय पाटील, सय्यद उमर मोईन, अनिता शिवाजीराव राठोड, स्नेहल खंडू मोरे, अनुराधा अनिल पाटील, द्वितीय संघ - संदेश जितेंद्र अणुस्करे, आदित्य मिलींद बर्वे, तेजस्विनी रविंद्र शिंदे, ऋषीकेश रविंद्र भुले, तृतीय संघ - केतकी संतोष लब्दे, सुनिधी विनोद कुलकर्णी, साक्षी मिनार यादव, सोनिया सुरेश पाटील, मंजू राजेश खांडोलकर. 

छायाचित्रण स्पर्धा: प्रथम - प्रथम सर्वदे, द्वितीय – ओंकार अनिल म्हेत्रे, तृतीय - आदित्य सी. पोटे

तांत्रिक पोस्टर प्रदर्शन: प्रथम - आसावरी रामकृष्ण ठाकरे, द्वितीय - किरण संदीप अथणे, तृतीय - ऋतुजा विवेक पाटील आणि अनिता अरूण कार्वेकर

पोस्टर निर्मिती (नववी ते बारावी गट- मिलेट माईंडफुलनेस): प्रथम - अनुष्का शिंदे, (श्री. वसंतराव चौगुले हायस्कूल, कोल्हापूर), द्वितीय - रूद्र कांथणे (कोल्हापूर पब्लिक स्कूल), तृतीय -  अनन्या रूद्र कुंभार (श्री वसंतराव चौगुले हायस्कूल).

युजी/पीजी/पीएचडी मिलेटस् (भारतातील कुपोषणाला पूर्णविराम): प्रथम - सिमीन सुहेल बागवान (कमला कॉलेज, कोल्हापूर), द्वितीय - श्रावणी हिरानाथ सावंत (बी.टेक.- फुडटेक), तृतीय - ऋतुजा संजय वाडकर (कमला कॉलेज, कोल्हापूर)