शिवाजी विद्यापीठाच्या मेळाव्यात ८० दिव्यांगांना रोजगार

कोल्हापूर, दि. २८ जून: शिवाजी विद्यापीठातर्फे केवळ दिव्यांगांसाठी आयोजित करण्यात आलेल्या रोजगार व कौशल्य विकास मेळाव्यात आज ८० दिव्यांग उमेदवारांची विविध आस्थापनांमध्ये निवड झाली, अशी माहिती मेळाव्याचे समन्वयक डॉ. ए.एम. गुरव यांनी दिली.

आजच्या मेळाव्यास मेंदू विकारग्रस्त १४, मूक व कर्णबधीर ६९, अंध ३८, अस्थी व इतर व्यंग असणारे १७५ असे एकूण २९६ दिव्यांग उमेदवार उपस्थित राहिले. त्यामध्ये मुलींचे प्रमाण सुमारे ४० टक्के होते. यापैकी ८० उमेदवारांची विविध रोजगारांसाठी निवड झाली. यामध्ये डॉ. रेड्डीजमध्ये २८, एल.आय.सी.मध्ये ९, युरेका फोर्ब्जमध्ये ८, स्कायलार्कमध्ये १० तर शिवाजी विद्यापीठात २५ उमेदवारांची निवड झाली.