‘कोविड-१९’विरोधातील लढाईत थेट रस्त्यावर न उतरता सुद्धा योगदान शक्य: कुलगुरू डॉ. नितीन करमळकर

शिवाजी विद्यापीठाचा राष्ट्रीय सेवा योजना कक्ष व युनिसेफ यांच्या संयुक्त विद्यमाने आयोजित युट्यूब ऑनलाइन प्रशिक्षणात बीजभाषण करताना सावित्रीबाई फुले पुणे विद्यापीठाचे कुलगुरू डॉ. नितीन करमळकर. (हिरव्या चौकटीत)

'कोविड-१९'विषयक ऑनलाइन मार्गदर्शन सत्रातील एक स्लाईड

'कोविड-१९'विषयक ऑनलाइन मार्गदर्शन सत्रातील एक स्लाईड

शिवाजी विद्यापीठाचा राष्ट्रीय सेवा योजना कक्ष व युनिसेफ यांच्या संयुक्त विद्यमाने आयोजित युट्यूब ऑनलाइन प्रशिक्षणाच्या समारोप सत्रात बोलताना शिवाजी विद्यापीठाचे कुलगुरू डॉ. देवानंद शिंदे. (पहिल्या स्तंभात सर्वात वर हिरव्या चौकटीत)

कोल्हापूर, दि. २३ एप्रिल: ‘कोविड-१९’ साथीच्या काळात थेट रस्त्यावर न उतरता सुद्धा राष्ट्रीय सेवा योजनेच्या स्वयंसेवकांसह सर्वसामान्य विद्यार्थ्यांना सुद्धा खूप मोठ्या प्रमाणावर सामाजिक योगदान देता येऊ शकते, असे प्रतिपादन सावित्रीबाई फुले पुणे विद्यापीठाचे कुलगुरू डॉ. नितीन करमळकर यांनी आज केले.

शिवाजी विद्यापीठाचा राष्ट्रीय सेवा योजना कक्ष आणि युनिसेफ यांच्या संयुक्त विद्यमाने आज दुपारी ३ ते ५ या कालावधीत कोरोनासंदर्भात घ्यावयाच्या दक्षतेबाबत युट्यूबच्या माध्यमातून ऑनलाईन प्रशिक्षणाचे आयोजन करण्यात आले होते. त्यावेळी बीजभाषण करताना कुलगुरू डॉ. करमळकर बोलत होते.

कुलगुरू डॉ. करमळकर म्हणाले, कोविड-१९च्या साथीने जगभरातच अक्राळविक्राळ स्वरुप धारण केले आहे. त्यामुळे सर्वच पाथळ्यांवर त्याबाबत चिंतेचे वातावरण आहे. या साथीचे स्वरुप आणि त्या कामी राष्ट्रीय सेवा योजनेचे योगदान या संदर्भात आपल्याकडे मोठ्या प्रमाणात मंथन व कार्यही सुरू आहे. विशेषतः राज्यपाल महोदयांनी राष्ट्रीय सेवा योजनेच्या आपत्ती व्यवस्थापन युनिटच्या माध्यमातून या प्रसंगी सहभाग द्यावा, असे आवाहन कुलगुरूंच्या बैठकीमध्ये केले. त्यानुसार, एव्हाना सर्वच विद्यापीठांमधील एनएसएस कक्ष गतिमानतेने या परिस्थितीत योगदान देत आहे. तथापि, एनएसएसच्या स्वयंसेवकांना तसेच अन्य विद्यार्थ्यांना सुद्धा प्रत्यक्ष रस्त्यावर न उतरता देखील या साथीविरोधातील लढाईत आपले योगदान देता येणे शक्य आहे. पुणे विद्यापीठाच्या एनएसएसचे कोणीही स्वयंसेवक रस्त्यावर नाहीत, मात्र अप्रत्यक्ष योगदान देण्यात ते आघाडीवर आहेत. यामध्ये हे विद्यार्थी चार प्रकारे आपले योगदान देत आहेत. त्यामध्ये गुगल अॅप तयार करून त्या माध्यमातून रक्तदाते व रक्तगट यांची यादी तयार करण्याचे मोठे काम करण्यात आले आहे. त्याखेरीज विद्यार्थी आपापल्या घराच्या परिसरातील साधारण दहा कुटुंबांची काळजी घेऊ शकतील. या कुटुंबांना भाजीपाला, किराणा आणून देणे, बँकेतून पैसे काढून आणून देणे इत्यादी स्वरुपाची कामे आरोग्यविषयक दक्षता घेऊन करता येऊ शकतात. सॅनिटायझर ही आजच्या काळातली फार मोठी गरज बनली आहे. त्यामुळे संलग्नित महाविद्यालयांतील विज्ञान अधिविभागांतून सॅनिटायझर निर्मिती करण्यास सुरवात झाली आहे. पोलीस कर्मचारी, आरोग्य क्षेत्रातील डॉक्टर, सेवक, परिचारक आदी कोविड वॉरियर्सना या सॅनिटायझरचा पुरवठा करण्यात येणार आहे. मास्क निर्मिती ही सुद्धा आजच्या काळाची गरज आहे. विद्यार्थी घरबसल्या मास्क तयार करून परिसरातल्या नागरिकांसह कोविड वॉरियर्सना त्याचा पुरवठा करू शकतात. अशा अनेक पद्धतींनी एनएसएस स्वयंसेवकांना या साथीच्या काळात आपले योगदान देता येणे शक्य आहे, असे त्यांनी सांगितले.

या प्रशिक्षण सत्राचा समारोप शिवाजी विद्यापीठाचे कुलगुरू डॉ. देवानंद शिंदे यांच्या मार्गदर्शनाने झाला. डॉ. शिंदे म्हणाले, मानवनिर्मित अगर नैसर्गिक संकटाच्या काळात शिवाजी विद्यापीठ पूर्ण क्षमतेने पुढाकार घेऊन त्या संकटावर मात करण्यासाठी  सामाजिक बांधीलकीच्या भावनेतून काम करीत असते. गतवर्षी येऊन गेलेला महापूर असो की सध्याची कोरोनाची साथ. या सर्व परिस्थितीत विद्यापीठाच्या एनएसएसने प्रचंड स्वरुपाचे योगदान दिलेले आहे. सध्याच्या संकट काळात शिवाजी विद्यापीठाशी संलग्नित सर्व महाविद्यालयांमधील राष्ट्रीय सेवा योजना (NSS) यांचे स्वयंसेवक व स्वयंसेविकांवर कोरोनाविरुद्धच्या लढाईत सहभागी होण्याची मोठी जबाबदारी निभावत आहेत. कोरोनाविरुद्धच्या युद्धात विद्यापीठाच्या राष्ट्रीय सेवा योजनेचे स्वयंसेवक पूर्ण तयारीनिशी उतरले असून प्रत्यक्ष तसेच सोशल मीडियाच्या माध्यमातून जनजागृतीचे कार्य प्रभावीपणे करत आहेत. एन.एस.एस.चे सुमारे २८,००० स्वयंसेवक फेसबुक, व्हॉट्सअप यांसह इतर सोशल मीडियाचा वापर करत ५० लाखांहून अधिक लोकांपर्यँत प्रत्यक्ष- अप्रत्यक्ष पोहोचत आहेत. अगदी नागरिकांच्या कौटुंबिक अडीअडचणींची माहिती घेऊन अनेक वेळा स्वतः तर काही वेळा प्रशासनाच्या माध्यमातून त्यांना तत्परतेने मदत करत आहेत. गरजू, फिरस्ते, गावोगावचे असहाय ज्येष्ठ नागरिक, अनाथ, दिव्यांग इत्यादी लोकांच्या मदतीला जात आहेत. लोकांना सॅनिटायझर्स, मास्क यांचे वितरण, किराणा, भाजीपाला, औषधे व इतर जीवनावश्यक वस्तूंचा पुरवठा आदी महत्वाची कामे एनएसएसचे स्वयंसेवक करत आहेत. कोरोनाचा वाढता प्रादुर्भाव लक्षात घेता शिवाजी विद्यापीठाच्या वसतिगृहांत १००० बेडचे आयसोलेशन केंद्र तात्पुरत्या स्वरूपात सुरू केले गेले आहे. त्याचप्रमाणे मानसिकदृष्ट्याही याचे नागरिकांवर विपरित परिणाम सामोरे येत आहेत. त्या दृष्टीने समुपदेशन सेवाही विद्यापीठाद्वारे पुरविली जात आहे. दिवसाला पाच ते दहा फोन या कक्षाकडे प्राप्त होत असून संवादातून त्यांना योग्य प्रकारे समुपदेशन देण्याचे कामही विद्यापीठ करीत आहे, अशी माहितीही त्यांनी दिली.

या प्रशिक्षण सत्रात एनएसएसच्या महाराष्ट्र व गोवा विभागाचे प्रादेशिक संचालक श्री. डी. कार्थिजेन, राज्य समन्वयक डॉ. अतुल साळुंखे, युनिसेफच्या अधिकारी डॉ.अपर्णा देशपांडे, डॉ. ज्योती पोटारे, डॉ. जी.के. पांडगे, डॉ. राजलक्ष्मी नायर आणि डॉ. स्वाती मोहपात्रा यांनी कोरोनाशी निगडित विविध विषयांवर सविस्तर मार्गदर्शन केले. डॉ. प्रभाकर देसाई यांनी स्वागत व प्रास्ताविक केले. या ऑनलाइन प्रशिक्षणात एनएसएसचे राज्यभरातील समन्वयक, स्वयंसेवक, संलग्नित महाविद्यालयांतील आजी-माजी स्वयंसेवक- स्वयंसेविका  आजी- माजी विद्यार्थी- विद्यार्थिनी, प्राध्यापक, प्रशासकीय कर्मचारी यांच्यासह सर्वसामान्य नागरिकही मोठ्या संख्येने सहभागी झाले.

(हे सत्र युट्यूबच्या https://www.youtube.com/watch?v=zFrQ73nHHYI&feature=youtu.be या लिंकवर उपलब्ध आहे. इच्छुक त्याचा लाभ घेऊ शकतात.)

महर्षी वि.रा. शिंदे यांना जयंतीनिमित्त शिवाजी विद्यापीठात अभिवादन

महर्षी वि.रा. शिंदे यांच्या जयंतीनिमित्त त्यांच्या प्रतिमेस अभिवादन करताना कुलगुरू डॉ. देवानंद शिंदे व प्र-कुलगुरू डॉ. डी.टी. शिर्के. सोबत (डावीकडून) डॉ. नंदकुमार मोरे, कुलसचिव डॉ. विलास नांदवडेकर व डॉ. रणधीर शिंदे.

कोल्हापूर, दि. २३ एप्रिल: भारतीय अस्पृश्यतेच्या प्रश्नाचे गाढे अभ्यासक महर्षी विठ्ठल रामजी शिंदे यांच्या जयंतीनिमित्त शिवाजी विद्यापीठात अभिवादन करण्यात आले.

कुलगुरू डॉ. देवानंद शिंदे आणि प्र-कुलगुरू डॉ. डी.टी. शिर्के यांच्या हस्ते महर्षी शिंदे यांच्या प्रतिमेस पुष्पहार अर्पण करण्यात आला. यावेळी कुलसचिव डॉ. विलास नांदवडेकर, वित्त व लेखाधिकारी व्ही.टी. पाटील, विद्यापीठाच्या महर्षी विठ्ठल रामजी शिंदे अध्यासनाचे प्रमुख डॉ. रणधीर शिंदे, मराठी अधिविभागाचे डॉ. नंदकुमार मोरे, उपकुलसचिव डॉ. व्ही.एन. शिंदे उपस्थित होते. सोशल डिस्टन्सिंगचे नियम पाळून हा कार्यक्रम करण्यात आला.

शिवाजी विद्यापीठातर्फे कर्मचारी, रहिवाशांना सॅनिटायझर, मास्कच्या १००० कीटचे वाटप

कुलगुरू निवासस्थानी कार्यरत सुरक्षा रक्षकांना सॅनिटायझर व मास्क कीट देऊन राष्ट्रीय सेवा योजनेच्या मोहिमेचा प्रारंभ करताना कुलगुरू डॉ. देवानंद शिंदे. सोबत डॉ. अभय जायभाये. 

कोल्हापूर, दि. १७ एप्रिल: शिवाजी विद्यापीठाच्या राष्ट्रीय सेवा योजना कक्षातर्फे आज विद्यापीठात अत्यावश्यक सेवेवर कार्यरत असणाऱ्या सेवकांबरोबरच विद्यापीठ कॅम्पसवरील रहिवाशांना सॅनिटायझर आणि मास्कच्या सुमारे १००० कीटचे वाटप करण्यात आले.

शिवाजी विद्यापीठामध्ये सुरक्षा, उद्यान, आरोग्य तसेच पाणीपुरवठा आदी अत्यावश्यक सेवांवर कर्मचारी कार्यरत आहेत. त्याचप्रमाणे अत्यावश्यक कार्यालयीन कामकाजाच्या निकडीनुसार आस्थापनासह अन्य काही विभागांतील कर्मचारीही कामकाजावर उपस्थित राहात असतात. त्याचप्रमाणे विद्यापीठाच्या विविध निवासस्थानांमध्ये अनेक शिक्षक, प्रशासकीय सेवक आणि त्यांचे कुटुंबिय राहतात. कोरोना विषाणू साथीच्या पार्श्वभूमीवर या सर्व घटकांच्या आरोग्य सुरक्षेच्या दृष्टीने विद्यापीठाच्या राष्ट्रीय सेवा योजना (एनएसएस) कक्षाच्या वतीने या सर्व घटकांना सॅनिटायझर व मास्क यांच्या कीटचे वाटप करण्यात आले.

या उपक्रमाची सुरवात कुलगुरू डॉ. देवानंद शिंदे यांच्या निवासस्थानापासून करण्यात आली. येथे कार्यरत सुरक्षा रक्षकांना कुलगुरू डॉ. शिंदे यांच्या हस्ते कीट देऊन मोहिमेस प्रारंभ करण्यात आला. त्यानंतर प्र-कुलगुरू डॉ. डी.टी. शिर्के आणि कुलसचिव डॉ. विलास नांदवडेकर यांच्याही निवासस्थानी कार्यरत असलेल्या रक्षकांना त्यांच्या हस्ते कीट वाटप करण्यात आले. त्यानंतर विद्यापीठाच्या शिव सहाय्यता आपत्ती व्यवस्थापन केंद्राचे समन्वयक डॉ. डी.के. गायकवाड आणि राष्ट्रीय सेवा योजना समन्वयक डॉ. अभय जायभाये यांच्या मार्गदर्शनाखाली एनएसएसच्या स्वयंसेवकांनी कॅम्पसवर कार्यरत सर्व सुरक्षा रक्षक, कर्मचारी आणि निवासी यांना कीटचे वाटप करण्यात आले. कीट वाटप करीत असताना कोरोनाच्या बाबतीत आवश्यक दक्षता घेण्याच्या सूचनाही सर्व संबंधितांना करण्यात आल्या.

‘एनएसएस’चा कौतुकास्पद उपक्रम: कुलगुरू डॉ. शिंदे

शिवाजी विद्यापीठाच्या एनएसएस कक्षातर्फे हाती घेण्यात आलेला सॅनिटायझर कीट वाटपाचा उपक्रम अत्यंत महत्त्वाचा व कौतुकास्पद आहे, असे मत कुलगुरू डॉ. देवानंद शिंदे यांनी व्यक्त केले. यामुळे सद्यस्थितीत आरोग्य सुरक्षेच्या दृष्टीने अत्यावश्यक असलेल्या या वस्तूंसाठी कॅम्पसवरील कोणालाही बाहेर जावे लागणार नाही आणि सोशल डिस्टन्सिंग पाळले जाईल. दिलेल्या मास्कमुळेही सार्वजनिक आरोग्य निकषांचे पालन केले जाईल, अशी अपेक्षाही त्यांनी व्यक्त केली.

कॅम्पसवरील कर्मचाऱ्यांनी घरी राहावे, सुरक्षित राहावे, या दृष्टीने एनएसएसचा उपक्रम महत्त्वाचा आहे. सर्वच कर्मचाऱ्यांनी आरोग्य सुरक्षाविषयक निकषांचे पालन करून कोरोनाला पराभूत करावे, असे आवाहन प्र-कुलगुरू डॉ. डी.टी. शिर्के यांनी व्यक्त केले.

शिवाजी विद्यापीठात आंबेडकर जयंती साजरी

शिवाजी विद्यापीठात डॉ. बाबासाहेब आंबेडकर यांच्या प्रतिमेस पुष्पहार अर्पण केल्यानंतर कुलगुरू डॉ. देवानंद शिंदे, प्र-कुलगुरू डॉ. डी.टी. शिर्के, कुलसचिव डॉ. विलास नांदवडेकर, डॉ. बाबासाहेब आंबेडकर संशोधन व विकास केंद्राचे संचालक डॉ. एस.एस. महाजन. 

कोल्हापूर, दि. १४ एप्रिल: भारतरत्न डॉ. बाबासाहेब आंबेडकर यांच्या जयंतीनिमित्त आज शिवाजी विद्यापीठात त्यांच्या पवित्र स्मृतींना अभिवादन करण्यात आले. सोशल डिस्टन्सिंगचे पूर्णतः पालन करीत जयंती साजरी करण्यात आली.

विद्यापीठाच्या मुख्य प्रशासकीय इमारतीमध्ये डॉ. बाबासाहेब आंबेडकर यांच्या प्रतिमेस कुलगुरू डॉ. देवानंद शिंदे, प्र-कुलगुरू डॉ. डी.टी. शिर्के यांच्या हस्ते पुष्पहार अर्पण करण्यात आला. यावेळी कुलसचिव डॉ. विलास नांदवडेकर, वित्त व लेखाधिकारी व्ही.टी. पाटील, परीक्षा व मूल्यमापन मंडळाचे संचालक गजानन पळसे, डॉ. बाबासाहेब आंबेडकर संशोधन व विकास केंद्राचे संचालक डॉ. एस.एस. महाजन, विद्यार्थी विकास विभागाचे संचालक डॉ. आर.व्ही. गुरव, अधिष्ठाता डॉ. पी.डी. राऊत आदी उपस्थित होते.

कोरोनाच्या साथीला मात देण्यासाठी ‘एनएसएस’ची फौज प्रशासनाच्या साथीला! : कुलगुरू डॉ. देवानंद शिंदे

कोल्हापूर, दि. १० एप्रिल: कोरोना विषाणू प्रादुर्भावाच्या साथीला रोखण्यासाठी शिवाजी विद्यापीठ आणि संलग्नित महाविद्यालयांतील राष्ट्रीय सेवा योजनेतील सुमारे २८ हजार स्वयंसेवक नागरिकांच्या सेवेसाठी आणि प्रशासनाच्या प्रत्यक्ष-अप्रत्यक्ष मदतीसाठी तत्पर आहेत. ही कामे करीत असताना त्यांनी नागरिकांबरोबरच स्वतःच्या आरोग्याचीही दक्षता घ्यावी, असे आवाहन शिवाजी विद्यापीठाचे कुलगुरू डॉ. देवानंद शिंदे यांनी केले आहे.

कुलगुरू डॉ. शिंदे यांनी म्हटले आहे की, मानवनिर्मिती अगर नैसर्गिक संकटाच्या काळात शिवाजी विद्यापीठ पूर्ण क्षमतेने पुढाकार घेऊन त्या संकटावर मात करण्यासाठी  सामाजिक बांधीलकीच्या भावनेतून काम करीत असते. कोरोनाचा वाढता प्रादुर्भाव लक्षात घेता शिवाजी विद्यापीठाच्या वसतिगृहांत १००० बेडचे आयसोलेशन केंद्र तात्पुरत्या स्वरूपात सुरू केले जात आहे.

सध्याच्या संकट काळात शिवाजी विद्यापीठाशी संलग्नित सर्व महाविद्यालयांमधील राष्ट्रीय सेवा योजना (NSS), राष्ट्रीय छात्र सेना (NCC) यांच्या स्वयंसेवक व स्वयंसेविकांवर कोरोनाविरुद्धच्या लढाईत सहभागी होण्याची मोठी जबाबदारी आली आहे. या युद्धात विद्यापीठाच्या राष्ट्रीय सेवा योजनेचे स्वयंसेवक पूर्ण तयारीनिशी उतरले असून सोशल मीडियाच्या माध्यमातून जनजागृतीचे कार्य प्रभावीपणे करत आहेत, याचा आपल्याला अभिमान असल्याचेही कुलगुरू डॉ. शिंदे यांनी नमूद केले आहे.

एन.एस.एस.चे सुमारे २८,००० स्वयंसेवक फेसबुक, व्हॉट्सअप यांसह इतर सोशल मीडियाचा वापर करत ५० लाखांहून अधिक लोकांपर्यँत प्रत्यक्ष- अप्रत्यक्ष पद्धतीने पोहोचत आहेत. अगदी नागरिकांच्या कौटुंबिक अडीअडचणींची माहिती घेऊन अनेक वेळा स्वतः तर काही वेळा प्रशासनाच्या माध्यमातून त्यांना तत्परतेने मदत करत आहेत. गरजू, फिरस्ते, गावोगावचे असहाय ज्येष्ठ नागरिक, अनाथ, दिव्यांग इत्यादी लोकांच्या मदतीला जात आहेत. लोकांना सॅनिटायझर्स, मास्क यांचे वितरण, किराणा, भाजीपाला, औषधे व इतर जीवनावश्यक वस्तूंचा पुरवठा आदी महत्वाची कामे NSS चे स्वयंसेवक करत आहेत. 

सातारा, सांगली आणि कोल्हापूर या तिन्ही जिल्ह्यांत प्रशासनाच्या मदतीसाठी हेल्पलाईनमध्ये काम करण्यासाठी  इच्छुक स्वयंसेवकांची पालकांच्या परवानगीने नोंदणी सुरू आहे. यासाठी स्वतंत्र गुगल रजिस्ट्रेशन फॉर्म तयार केला आहे. त्याद्वारे स्वयंसेवकांनी नोंदणी करावी आणि या राष्ट्रीय आपत्तीच्या क्षणी आपला मोलाचा सहभाग नोंदवावा, असे आवाहन कुलगुरूंनी केले आहे.

मात्र, त्याचवेळी कोरोना विषाणूच्या साथीच्या प्रादुर्भावामुळे आपण सारेच त्रस्त आहोत. सद्यस्थिती पाहता लॉकडाऊनच्या कालावधीत सुद्धा कोरोनाबाधित रुग्णांची व बळींची संख्या वाढतीच आहे. या पार्श्वभूमीवर राज्य व जिल्हा प्रशासनाकडून वेळोवेळी निर्गमित करण्यात आलेले सोशल डिस्टन्सिंगसह मास्क वापरणे, साबणाने हात धुणे आदी दक्षता आपण व्यक्तीगत व कौटुंबिक स्तरावर घेणे अत्यावश्यक आहे. त्या आपण आवर्जून घ्याव्यात. स्वतःच्या आरोग्यविषयक दक्षता जबाबदारपूर्वक घेण्याचे भानही बाळगावे, असे आवाहनही कुलगुरू डॉ. शिंदे यांनी केले आहे.

विद्यापीठात सायबर सिक्युरिटीबाबत १० एप्रिलला ऑनलाईन कार्यशाळा

कोल्हापूर, दि. ७ एप्रिल: सध्या कोरोना विषाणू साथीवर प्रतिबंधक उपाय म्हणून पुकारलेल्या लॉकडाऊनमुळे डिजीटल साधनांच्या द्वारे आर्थिक तसेच संवाद व्यवहार वाढले आहेत. त्यामुळे सायबर व फिशिंग अॅटॅक होण्याचे प्रमाणही वाढले आहे. हे लक्षात घेऊन शिवाजी विद्यापीठाने येत्या शुक्रवारी (१० एप्रिल) सायबर सिक्युरिटीविषयक एकदिवसीय ऑनलाइन राष्ट्रीय कार्यशाळेचे आयोजन केले आहे. विशेष म्हणजे या कार्यशाळेची ऑनलाइन नोंदणी सुरू होताच पहिल्या तासाभरातच देशभरातून सुमारे ८७ इतकी विक्रमी नावनोंदणी झाली आहे, अशी माहिती विद्यापीठाच्या सायबर सिक्युरिटी व डाटा सायन्सेस फॅकल्टी डेव्हलपमेंट केंद्राचे संचालक डॉ. आर.के. कामत यांनी दिली आहे.

डॉ. आर.के. कामत यांनी दिलेल्या माहितीनुसार, जगभरात कोरोना तथा कोविड-१९ या विषाणूचा उद्रेक झाल्याने अन्य देशांप्रमाणेच भारतामध्येही गंभीर स्थिती लक्षात घेता १४ एप्रिलपर्यंत लॉकडाऊन घोषित करण्यात आला आहे. त्यामुळे नागरिकांना घरात बसून या विषाणूचा प्रतिकार करावा लागत आहे. जवळपास सर्वच आस्थापनांनी आपल्या कर्मचाऱ्यांना ‘वर्क फ्रॉम होम’चा सल्ला दिला आहे. त्यामुळे बहुतेक जणांना डिजीटल साधनांचा आधार घेऊनच काम करावे लागत आहे. त्याचप्रमाणे मोबाईल रिचार्जपासून ते विविध बिल पेमेंटपर्यंत जवळपास सर्वच आर्थिक व्यवहार ऑनलाईन करावे लागत आहेत. या व्यवहारांत जशी वाढ झाली, त्याच प्रमाणात सायबर व फिशिंग हल्ल्यांमध्येही वाढ झाल्याची प्रकरणे सामोरी येत आहेत. त्यामुळे या संदर्भात जनजागृती व योग्य सुरक्षाविषयक दक्षता कशी घ्यावी, याची विस्तृत माहिती देण्याकरिता केंद्रीय मनुष्यबळ विकास मंत्रालयाच्या पंडित मदनमोहन मालवीय शिक्षक व शिक्षणविषयक राष्ट्रीय अभियानांतर्गत शिवाजी विद्यापीठात कार्यरत असलेल्या सायबर सिक्युरिटी व डाटा सायन्सेस फॅकल्टी डेव्हलपमेंट केंद्राच्या वतीने येत्या १० एप्रिल २०२० रोजी सायबर सिक्युरिटीविषयक एकदिवसीय ऑनलाईन कार्यशाळा आयोजित करण्यात आली आहे. ऑनलाईन नोंदणी सुरू होताच सुमारे ८७ जणांनी नोंदणी केली. ‘नॅसकॉम’ मान्यताप्राप्त स्कील्स फॅक्टरी लर्निंग प्रा. लि. आणि टाटा कम्युनिकेशन्स यांच्या सहकार्याने कार्यशाळेचे आयोजन करण्यात आले आहे. सदर कार्यशाळेत इन्ट्रोडक्शन टू सायबर सिक्युरिटी, सायबर अॅटॅक्स क्लासिफिकेशन आणि स्मार्टफोन अँड पेमेंट सिक्युरिटी या विषयांवर ख्यातनाम तज्ज्ञ मार्गदर्शन करणार आहेत. कार्यशाळेबाबत अधिक माहितीसाठी http://sangnaksuraksha.com/ या वेबसाईटला भेट द्यावी, असे आवाहन डॉ. कामत यांनी केले आहे.

‘कोरोना’विषयक मानसिक समस्या निवारणासाठी शिवाजी विद्यापीठाची विशेष समुपदेशन हेल्पलाईन

कोल्हापूर, दि. ५ एप्रिल: कोरोना विषाणूच्या साथीच्या अनुषंगाने नागरिकांमध्ये विविध प्रकारच्या मानसिक स्वास्थ्याशी निगडित समस्या उद्भवत असल्याची बाब लक्षात घेऊन शिवाजी विद्यापीठाने संबंधित नागरिकांसाठी विशेष हेल्पलाईन निर्माण करण्याचा निर्णय घेतला आहे. जिल्हा प्रशासनाच्या मान्यतेने आणि सहकार्याने सदर समुपदेशन हेल्पलाईन लवकरच कार्यान्वित करण्यात येत आहे. गरज भासल्यास प्रत्यक्ष समुपदेशनही करण्यात येणार आहे. ही माहिती कुलसचिव डॉ. विलास नांदवडेकर यांनी दिली आहे.

कुलसचिव डॉ. नांदवडेकर यांनी दिलेल्या माहितीनुसार, कोरोना विषाणूची साथ आणि त्या अनुषंगाने देशात उद्भवलेली अभूतपूर्व परिस्थिती यामुळे नागरिकांच्या मानसिक स्वास्थ्यावर परिणाम होण्याची शक्यता असून मानसिक व्याधीची सुरवात या कालावधीमध्ये होऊ शकते. त्याचा परिणाम शारीरिक स्वास्थ्यावरही होण्याची शक्यता असते. तथापि, अशा परिस्थितीत जर प्राथमिक टप्प्यावरच योग्य व शास्त्रशुद्ध समुपदेशन मिळाले, तर व्यक्तीची सकारात्मकता वाढून त्याचा मानसिक आजारापासून बचाव करता येऊ शकेल. ही बाब लक्षात घेऊन कुलगुरू डॉ. देवानंद शिंदे व प्र-कुलगुरू डॉ. डी.टी. शिर्के यांच्या मार्गदर्शनाखाली विद्यापीठाच्या यशवंतराव चव्हाण स्कूल ऑफ रुरल डेव्हलपमेंटच्या एम.एस.डब्ल्यू. अधिविभागाचे प्रा. अमोल मिणचेकर  समन्वयाने नागरिकांच्या मानसिक स्वास्थ्याकरिता फोन-इन समुपदेशन उपक्रम राबविण्यात येणार आहे. शासनाकडून वेळोवेळी निर्गमित होणारे आदेश, समुपदेशनाची व्यावसायिक मूल्ये आणि प्रतिबंधात्मक दक्षता घेऊन सदर समुपदेशन करण्यात येणार आहे. सदर उपक्रमात सहभागी शिक्षक, विद्यार्थी हे जिल्हा प्रशासनाच्या मान्यतेने गरज भासल्यास प्रत्यक्ष समुपदेशनासाठीही जातील.

सदर समुपदेशनासाठी आवश्यक अशी कार्यप्रणाली आणि मार्गदर्शक तत्त्वांचीही निश्चिती करण्यात आली आहे. त्यानुसार, विद्यापीठात एमएसडब्ल्यू शिकविणारे शिक्षक, विद्यार्थी व माजी विद्यार्थी अशी एकूण ३० जणांची टीम हेल्पलाईनद्वारे संचारबंदी कालावधीत योग्य ती दक्षता घेऊन समुपदेशन उपक्रम राबवेल. जिल्हा आपत्ती व्यवस्थापन प्राधिकरणाकडून सदर विद्यार्थ्यांना ओळखपत्रे दिली जातील. सदर हेल्पलाईन सकाळी ९ ते सायंकाळी ६ या कालावधीत कार्यान्वित राहील. या सर्व प्रणालीची माहिती हेल्पलाईन क्रमांकांसह विद्यापीठाच्या संकेतस्थळावरून व समाजमाध्यमांतून उपलब्ध केली जाईल.

नागरिकांच्या मानसिक स्वास्थ्यासाठी समुपदेशन आवश्यक: कुलगुरू डॉ. शिंदे

कोरोना विषाणूच्या साथीमुळे आणि त्या अनुषंगाने उद्भवलेल्या भीषण परिस्थितीमुळे नागरिक मोठ्या दडपणाखाली तसेच भीती, असहायता आणि निराशेच्या भावनेने ग्रस्त झाल्याची उदाहरणे समोर येत आहेत. अशा परिस्थितीत संवाद हा अतिशय महत्त्वाचा उपाय आणि उपचार आहे. ही बाब लक्षात घेऊन विद्यापीठाने आपल्या एमएसडब्ल्यू अधिविभागाच्या माध्यमातून नागरिकांच्या मानसिक स्वास्थ्यासाठी समुपदेशन हेल्पलाईन सुरू करण्याचा निर्णय घेतला आहे. गतवर्षी उद्भवलेल्या महापूर स्थितीमध्ये सुद्धा अनेक नागरिक अशा प्रकारे नैराश्यग्रस्त झाले होते. त्यावेळीही विद्यापीठाच्या एमएसडब्ल्यू विभागाच्या शिक्षक, विद्यार्थ्यांना संबंधित नागरिकांचे समुपदेशन करून त्यांचे मानसिक पुनर्वसन करण्यात मोलाची कामगिरी यशस्वीपणे बजावली होती. यावेळीही विद्यापीठ त्याच सामाजिक बांधिलकीच्या भावनेतून हेल्पलाईन सुरू करीत आहे. त्याचा नागरिकांना निश्चितपणे लाभ होईल, अशी खात्री आहे.

शिवाजी विद्यापीठाच्या कोरोनाविषयक समुपदेशनासाठी नियुक्त समुपदेशकांची नावे व संपर्क क्रमांक पुढीलप्रमाणे:-

१.      प्रा. अमोल मिणचेकर  (समन्वयक) – 9822567720

२.      विनोद ठिकणे – 9552127209

३.      मोहिनी देवकर – 9145609647

४.      सागर अवलक्की – 8600736147

५.      भैय्यासाहेब नलवडे – 9970965570

६.      स्नेहल जगदाळे – 7875137503

७.      नागेश पवार – 8788323500

८.      रागिणी बालुगडे – 7420979975

९.      पृथ्वीराज शेटे – 8830829301

१०.  सिद्धांत घोरपडे – 8830982805

११.  रेणुका देशमुख – 9421690358

१२.  सुशील कांबळे – 9168181595

१३.  शुभांगी मदने – 7066082819

१४.  ऋतुजा चौत्रे – 7798146776

१५.  गणेश भाड – 9552010520

१६.  सौरव वाघमारे – 9764891097

१७.  अक्षय बुगडे – 9158505182

१८.  दिनेश माळी – 9637096912

१९.  अमित सोनवणे – 9518553826

२०.  प्रियांका बनसोडे – 9970864960

२१.  आप्पासाहेब पाटील - 7219185983

२२.  वंदना चव्हाण – 7083644644

२३.  रागिणी शेट्ये – 8830169662

२४.  जयदीप गुरव – 7522978707

२५.  शिवाली दामुगडे – 9823491722

२६.  अमोल मस्के - 8530585952