संख्याशास्त्र अधिविभागात डेटा विश्लेषणाबाबत व्यवस्थापन विकास कार्यक्रम

शिवाजी विद्यापीठाच्या संख्याशास्त्र अधिविभागात आयोजित व्यवस्थापन विकास कार्यक्रमात बोलताना डॉ. राजन पडवळ. मंचावर (डावीकडून) अनिल नागराळे, डॉ. शशीभूषण महाडिक, डॉ. महादेव देशमुख, डॉ. सचिन पाटील आणि डॉ. सोमनाथ पवार.

शिवाजी विद्यापीठाच्या संख्याशास्त्र अधिविभागात आयोजित व्यवस्थापन विकास कार्यक्रमात बोलताना डॉ. महादेव देशमुख. समोर उपस्थित बँक अधिकारी व कर्मचारी 

शिवाजी विद्यापीठाच्या संख्याशास्त्र अधिविभागात आयोजित व्यवस्थापन विकास कार्यक्रमास उपस्थित मार्गदर्शक, अधिकारी व कर्मचारी

 

कोल्हापूर, दि. २८ जुलै: शिवाजी विद्यापीठाचा संख्याशास्त्र अधिविभाग आणि गुरुवर्य लक्ष्मणराव इनामदार सहकारी प्रशिक्षण केंद्र यांच्या संयुक्त विद्यमाने आणि कोल्हापूर जिल्हा नागरी बँक्स सहकारी असोसिएशन लिमिटेड यांच्या सहकार्याने पी.एम.-उषा प्रायोजित "डेटा विश्लेषण व बँकिंग नियामक अनुपालनासाठी मायक्रोसॉफ्ट एक्सेलचा वापर" या विषयावर एक दिवसीय व्यवस्थापन विकास कार्यक्रम शनिवारी (दि. २६) रामानुजन सभागृहात झाला. अध्यक्षस्थानी मानव्यशास्त्र विद्याशाखेचे अधिष्ठाता डॉ. महादेव देशमुख होते.

सहकारी बँकांतील अधिकारी व कर्मचाऱ्यांना एक्सेल वापरून प्रभावी पद्धतीने डेटा व्यवस्थापन, विश्लेषण, असेट लायबलिटी मॅनेजमेंट व नियामक अनुपालन यासंदर्भातील व्यावहारिक प्रशिक्षण प्रदान करणे हे कार्यक्रमाचे उद्दिष्ट होते. कार्यक्रमात एक्सेलमधील मूलभूत टूल्स व फंक्शन्स, बँकिंग नियामक निकषांनुसार अहवाल तयार करणे तसेच प्रत्यक्ष बँकिंग डेटावर आधारित प्रात्यक्षिक सत्र यांचा समावेश करण्यात आला.

पहिल्या सत्रात डॉ. सोमनाथ पवार यांनी एक्सेलच्या वापराची मूलभूत माहिती, महत्त्वाची साधने व बँकिंगसाठी उपयुक्त फंक्शन्स यांचे मार्गदर्शन केले. दुसऱ्या सत्रात रमेश लोणार (वित्त व्यवस्थापक, आरबीएल बँक) यांनी असेट लायबलिटी मॅनेजमेंट व नियामक अनुपालन या विषयांवर सखोल विवेचन केले. दुपारच्या सत्रात एस. व्ही. राजगुरू यांनी प्रत्यक्ष डेटावर आधारित विश्लेषणाचे प्रशिक्षण दिले. अंतिम सत्रात श्री. लोणार यांनी एक्सेल वापरून नियामक अनुपालनासाठी आवश्यक असणाऱ्या अहवालांचा प्रत्यक्ष सराव करून घेतला.

कार्यक्रमात कोल्हापूर जिल्ह्यातील विविध सहकारी बँकांमधील ६० अधिकारी आणि कर्मचाऱ्यांनी उत्स्फूर्त सहभाग नोंदविला. सहभागींसाठी विशेष अभ्यास साहित्य व प्रात्यक्षिक फाईल्स पुरवण्यात आल्या.

डॉ. राजन पडवळ यांनी स्वागत केले. अनिल नागराळे आणि डॉ. शशीभूषण महाडिक यांनी प्रस्तावना केली. डॉ. सोमनाथ पवार यांनी आभार मानले. कार्यक्रमाच्या आयोजनासाठी डॉ. शशीभूषण महाडिक (विभागप्रमुख, संख्याशास्त्र अधिविभाग), डॉ. राजन पडवळ (समन्वयक, गुरुवर्य लक्ष्मणराव इनामदार सहकारी प्रशिक्षण केंद्र), अनिल नागराळे (मुख्य कार्यकारी अधिकारी, कोल्हापूर जिल्हा नागरी बँक्स सहकारी असोसिएशन लिमिटेड), डॉ. सोमनाथ पवार (सहाय्यक प्राध्यापक, संख्याशास्त्र अधिविभाग व कार्यक्रम समन्वयक), एस. व्ही. राजगुरू आणि डॉ. सचिन पाटील, (सहाय्यक प्राध्यापक, संख्याशास्त्र अधिविभाग) यांनी योगदान दिले.