शिवाजी विद्यापीठाचे रशियन भाषेचे विद्यार्थी शैक्षणिक भेटीसाठी रशियात दाखल

 

शिवाजी विद्यापीठाच्या रशियन भाषेचे चार विद्यार्थी शैक्षणिक भेटीसाठी मॉस्को येथील रशियन पीपल्स फ्रेन्डशीप युनिव्हर्सिटी (RUDN) येथे दाखल झाले आहेत. छायाचित्रात राधा जाधव, प्रेरणा नलावडे, सारा नायकवडी आणि मयूर दादवणे दिसत आहेत.

कोल्हापूर, ता. १८: शिवाजी विद्यापीठाच्या विदेशी भाषा विभागातील रशियन भाषेच्या चार विद्यार्थ्यांना थेट रशियालाच शैक्षणिक भेट देण्याची संधी लाभली आहे. मॉस्को येथील नामवंत रशियन पीपल्स फ्रेन्डशिप युनिव्हर्सिटी (RUDN) येथे आयोजित समर स्कूलसाठी विभागातील राधा जाधव, प्रेरणा नलावडे, सारा नायकवडी आणि मयूर दादरणे हे चौघे रशियन भाषा आणि संस्कृतीच्या सखोल अभ्यासासाठी रशियात दाखल झाले आहेत.

विदेशी भाषा विभागाने गेल्या काही वर्षांत रशियन भाषा अध्यापनात विशेष प्रगती साधली आहे. परिणामी सावित्रीबाई फुले पुणे विद्यापीठ आणि रशियन पीपल्स फ्रेन्डशिप युनिव्हर्सिटी या संस्थांच्या शैक्षणिक सहकार्याने रशियातील समर स्कूलमध्ये सहभागी होण्याची संधी विद्यार्थ्यांना उपलब्ध झाली. १४ जुलै ते २८ जुलै या कालावधीत विद्यार्थ्यांना रशियन भाषेच्या प्रशिक्षणासह तेथील आधुनिक जीवनशैली, साहित्य आणि समाजव्यवस्था यांचाही अनुभव घेता येणार आहे. अभ्यासक्रमाचा संपूर्ण खर्च आयोजक संस्थेने उचलला असून विद्यार्थ्यांना निवास आणि शैक्षणिक सुविधा मोफत मिळणार आहेत.

विद्यार्थ्यांनी या संधीबाबत समाधान व्यक्त केले. रशियन भाषेच्या माध्यमातून आम्हाला रशिया प्रत्यक्ष पाहण्याची संधी मिळाली आहे. हा अनुभव रोमांचक आहे. आम्ही मॉस्कोतील सर्व प्रमुख ऐतिहासिक व सांस्कृतिक स्थळांना देखील भेटी देणार असल्याचे राधा जाधव या विद्यार्थिनीने सांगितले.

‘परदेशी भाषेतील अभिव्यक्तीचा आत्मविश्वास’

या उपक्रमाविषयी विदेशी भाषा विभागाच्या प्रमुख डॉ. मेघा पानसरे यांनी सांगितले की, हे यश आमच्यासह विद्यापीठासाठी अभिमानास्पद आहे. अशा संधी विद्यार्थ्यांचे जागतिक व्यक्तिमत्त्व घडवतात आणि परदेशी भाषेतील अभिव्यक्तीचा आत्मविश्वासही देतात.