आंतरराष्ट्रीय शैक्षणिक गुणवत्ता प्रकल्पात शिवाजी विद्यापीठाचा समावेश : डॉ. जगन्नाथ पाटील यांची घोषणा

शिवाजी विद्यापीठात आयोजित पत्रकार परिषदेत (डावीकडून) डॉ. आर.के. कामत, डॉ. जगन्नाथ पाटील, कुलगुरू डॉ. देवानंद शिंदे, कुलसचिव डॉ. विलास नांदवडेकर आणि परीक्षा व मूल्यमापन मंडळाचे संचालक महेश काकडे.

युरोपियन युनियमसमवेत संयुक्त प्रकल्पासाठी ‘नॅक’ राष्ट्रीय समन्वयक

कोल्हापूर, दि. २२ डिसेंबर: भारतीय उच्चशिक्षण व्यवस्थेत गुणवत्तेचे आंतरराष्ट्रीयीकरण करण्याच्या दृष्टीने भारताने युरोपियन युनियन या आंतरराष्ट्रीय शैक्षणिक गुणवत्ता क्षेत्रातील मान्यताप्राप्त संस्थेसमवेत संयुक्त सहकार्य प्रकल्प हाती घेतला असून भारतातर्फे ‘नॅक’ (बंगळूर) त्याचे समन्वयक म्हणून काम पाहात आहे. त्याचप्रमाणे भारतातर्फे निवडण्यात आलेल्या आठ भारतीय शैक्षणिक संस्थांमध्ये येथील शिवाजी विद्यापीठाचा समावेश करण्यात आला आहे, अशी घोषणा ‘नॅक’चे सल्लागार तसेच या प्रकल्पाचे समन्वयक डॉ. जगन्नाथ पाटील यांनी आज येथे पत्रकार परिषदेत केली. अध्यक्षस्थानी कुलगुरू डॉ. देवानंद शिंदे होते.

डॉ. जगन्नाथ पाटील म्हणाले, भारतामध्ये अनेक गुणवत्ताप्राप्त शिक्षण संस्था आहेत. तथापि, जागतिक क्रमवारीत पहिल्या शंभरात त्यामधील एकही नाही. नेमकी ही बाब हेरून भारतीय उच्चशिक्षणाचे गुणवत्ता संवर्धन करण्याच्या दृष्टीने एशिया-पॅसिफिक क्वालिटी नेटवर्क या संस्थेचे अध्यक्षपद भूषवित असताना युरोपियन युनियनबरोबर संवाद साधला. त्यातून युरोपियन युनियनच्या ‘इरॅस्मस प्लस’ या उपक्रमांतर्गत युरोपियन युनियन आणि भारत यांच्यात शैक्षणिक गुणवत्ता संवर्धनासाठी संवादाचा पूल निर्माण करण्यासाठी संयुक्त प्रकल्प हाती घेण्याचे निश्चित करण्यात आले. त्यानुसार, भारतातर्फे नॅकने आणि युनियनतर्फे स्पेनच्या बार्सिलोना विद्यापीठाने समन्वयक संस्था म्हणून काम पाहावयाचे ठरले. 'एनहान्सिंग क्वालिटी एश्युरन्स मॅनेजमेंट अॅन्ड बेंचमार्किंग स्ट्रॅटेजिस इन इंडियन युनिव्हर्सिटीज' (EQUAM-BI) असे या प्रकल्पाचे नाव आहे.

डॉ. पाटील पुढे म्हणाले, सुमारे एक दशलक्ष युरो किंमतीच्या या त्रैवार्षिक प्रकल्पात युरोपियन युनियनमधील तसेच भरतातील निवडक नामवंत विद्यापीठांचा समावेश करण्यात आला असून त्या आठ विद्यापीठांत कोल्हापूरच्या शिवाजी विद्यापीठाचा समावेश करण्यात आला. या निवडीमागे शिवाजी विद्यापीठाने राबविलेल्या बेस्ट प्रॅक्टीसेस अत्यंत महत्त्वाच्या ठरल्या. विद्यापीठात स्टुडंट सॅटिसफॅक्शनचे सर्वेक्षण गेली अनेक वर्षे अत्यंत सुरळीत व सुसूत्र पद्धतीने सुरू आहे, हे वेगळेपण आहे. त्याची नॅकने आपल्या राष्ट्रीय अहवालात मार्गदर्शक उपक्रम म्हणून नोंद घेतलेली आहे. या उपक्रमाचा नव्या नॅक मूल्यांकन पद्धतीत समावेशही केला आहे. ही सारी विद्यापीठे पुढील तीन वर्षे सर्व विद्यापीठीय व्यवस्थांचा अभ्यास करून एक सर्वंकष व सर्वसमावेशक स्वरुपाचे टुलकीट (कार्यप्रणाली) तयार करण्यात येणार आहे. सहभागी विद्यापीठांनी आपापल्य प्रकारच्या विद्यापीठांची माहिती संकलित करण्यासाठी पुढाकार घेणे अपेक्षित आहे. शिवाजी विद्यापीठाने देशातील प्रादेशिक विद्यापीठांचा डाटा संकलित करणे अभिप्रेत आहे, असे त्यांनी सांगितले.

या निवडीबद्दल कुलगुरू डॉ. शिंदे यांनी डॉ. पाटील यांना धन्यवाद दिले. त्याचप्रमाणे या प्रकल्पाच्या अनुषंगाने भारतात होणाऱ्या पुढील बैठकीचे यजमानपद भूषविण्याची संधी शिवाजी विद्यापीठाला प्राप्त झाल्याची माहितीही दिली. तसेच, विद्यापीठाच्या अंतर्गत गुणवत्ता हमी कक्षाचे समन्वयक डॉ. आर.के. कामत हे या उपक्रमासाठी विद्यापीठीय समन्वयक म्हणून काम पाहतील, असेही त्यांनी सांगितले.

प्रकल्पात समाविष्ट शैक्षणिक संस्थांची नावे पुढीलप्रमाणे-

युरोपियन संस्था-

·         युनिव्हर्सिटी दे बार्सिलोना, स्पेन (समन्वयक/ निधी धारक)

·         नॅशनल एजन्सी फॉर क्वालिटी अश्युरन्स अन्ड एक्रिडिटेशन ऑफ स्पेन (ए.एन.ई.सी.ए.-अनेका), स्पेन

·         कुंगलिगा टेक्निस्का होएगस्कोलन- केटीएच, स्वीडन

·         युनिव्हर्सिटी देग्लि स्टडी दी रोमा “ला सेपिएंझा”- युनिफॉर्मा-१, इटली

·         युनिव्हर्सिटी दे माँटपिलर- युएम- फ्रान्स

·         युनिव्हर्सिटी ऑफ निकोसिआ, युएन- सायप्रस

भारतीय संस्था-

·         नॅशनल असेसमेंट अन्ड अक्रिडिटेशन कौन्सिल- नॅक (भारतीय समन्वयक)

·         शिवाजी विद्यापीठ, कोल्हापूर

·         जादवपूर युनिव्हर्सिटी, कोलकता

·         सिम्बायोसिस इंटरनॅशनल युनिव्हर्सिटी, पुणे

·         इंडियन इन्स्टिट्यूट ऑफ टेक्नॉलॉजी, मद्रास

·         युनिव्हर्सिटी ऑफ म्हैसूर, म्हैसूर

·         एज्युलिंक प्रायव्हेट लिमिटेड, बेंगलुरू

·         मेंगलोर युनिव्हर्सिटी, मेंगलोर