आंतरराष्ट्रीय कुलगुरू परिषदेसाठी डॉ. देवानंद शिंदे तैवानला रवाना

Dr. Devanand Shinde

कोल्हापूर, दि. १९ जून: तैवान येथे आयोजित करण्यात आलेल्या ‘इंडो-तैवान कुलगुरू परिषदे’साठी शिवाजी विद्यापीठाचे कुलगुरू डॉ. देवानंद शिंदे काल तैवानला रवाना झाले.

तैवान सरकार, तैपेई इकॉनॉमिक एन्ड कल्चरल सेंटर इन इंडिया (टीईसीसी) यांचा शिक्षण विभाग आणि भारतीय विद्यापीठ महासंघ (एआययू) यांच्या संयुक्त विद्यमाने तैवानच्या राष्ट्रीय त्सिंग हुआ विद्यापीठात येत्या २१ जून रोजी ‘इंडो-तैवान कुलगुरू परिषद’ आयोजित करण्यात आली आहे. या परिषदेत सहभागी होण्यासाठी एआययूचे अध्यक्ष प्रा. पी.बी. शर्मा आणि सरचिटणीस प्रा. फुरकान कमर यांच्या नेतृत्वाखाली देशातील विविध विद्यापीठांच्या ११ कुलगुरूंचे शिष्टमंडळ रवाना झाले आहे. या शिष्टमंडळात राज्य अकृषी विद्यापीठाचे प्रतिनिधी म्हणून कुलगुरू डॉ. देवानंद शिंदे यांचा समावेश करण्यात आला आहे.

या परिषदेत भारत आणि तैवान या दोन देशांमधील उच्चशैक्षणिक सहसंबंध अधिक दृढ करण्याच्या दृष्टीने तसेच आंतरराष्ट्रीय उच्चशिक्षण क्षेत्रांतील विविध प्रवाहांचा वेध घेण्याच्या दृष्टीने विविध सत्रांत सर्वंकष चर्चा करण्यात येणार आहे.

कुलगुरू परिषदेत सहभागी होण्याबरोबरच भारतीय कुलगुरूंचे शिष्टमंडळ नॅशनल तैपेई युनिव्हर्सिटी ऑफ टेक्नॉलॉजी, नॅशनल त्सिंग हुआ युनिव्हर्सिटी, नॅशनल सिंक्रोट्रॉन रेडिएशन रिसर्च सेंटर (एनएसआरआरसी), नॅशनल तैवान युनिव्हर्सिटी, नॅशनल पॅलेस म्युझियम, नॅशनल शिएँग काई-शेक मेमोरियल हॉल आदी शैक्षणिक व सांस्कृतिकदृष्ट्या महत्त्वाच्या ठिकाणांना भेटी देणार आहेत.

तैवानची उच्चशिक्षण व्यवस्था अभ्यासण्याची संधी: कुलगुरू डॉ. शिंदे

इंडो-तैवान आंतरराष्ट्रीय कुलगुरू परिषदेच्या निमित्ताने तैवानमधील उच्चशिक्षण व्यवस्थेचा अभ्यास करण्याची एक महत्त्वाची संधी चालून आली आहे. तैवान येथील उच्चशिक्षण संस्था, विद्यापीठे, संशोधन व विकासाची यंत्रणा, त्यांमधील संधी आदी बाबींची माहिती घेणे आणि उभय देशांतील शैक्षणिक व सांस्कृतिक संबंध दृढ करण्याच्या दृष्टीने हा अभ्यास दौरा महत्त्वाचा ठरेल, असे मत कुलगुरू डॉ. देवानंद शिंदे यांनी व्यक्त केले.