दिव्यांगांसाठी रोजगाराभिमुख अभ्यासक्रमांची निर्मिती आवश्यक: डॉ. ताहा हाजिक

शिवाजी विद्यापीठात आयोजित दिव्यांगविषयक एकदिवसीय कार्यशाळेत मार्गदर्शन करताना गोव्याच्या सामाजिक कल्याण संचालनालयाचे मुख्य कार्यकारी अधिकारी डॉ. ताहा हाजिक. 

शिवाजी विद्यापीठात आयोजित दिव्यांगविषयक एकदिवसीय कार्यशाळेत मार्गदर्शन करताना गोव्याच्या सामाजिक कल्याण संचालनालयाचे मुख्य कार्यकारी अधिकारी डॉ. ताहा हाजिक. व्यासपीठावर (डावीकडून) डॉ. पी.बी. बिलावर, डॉ. नमिता खोत, प्र-कुलगुरू डॉ. डी.टी. शिर्के, डॉ. सारा डुव्हल आदी.

कोल्हापूर, दि. ८ जानेवारी: विज्ञान आणि तंत्रज्ञानाची जोड देऊन दिव्यांग विद्यार्थ्यांसाठी विविध कौशल्यपूर्ण रोजगाराभिमुख अभ्यासक्रम निर्माण करण्याची अत्यंत निकड आहे, असे प्रतिपादन गोवा येथील सामाजिक कल्याण संचालनालयाचे विशेष कार्यकारी अधिकारी डॉ. ताहा हाजिक यांनी आज येथे केले.

शिवाजी विद्यापीठाचे बॅ.बाळासाहेब खर्डेकर ज्ञानस्रोत केंद्र व समावेशी शिक्षण संसाधन केंद्र आणि ग्रंथालय व माहितीशास्त्र विभाग यांच्या संयुक्त विद्यमाने 'डेव्हलपमेंट ऑफ ॲक्सेसिबल लायब्ररी फॉर पर्सन्स विथ डिसॅबिलिटीज' या विषयावर विद्यापीठ, महाविद्यालयीन, सार्वजनिक ग्रंथपाल यांच्यासाठी आज एकदिवसीय राष्ट्रीय कार्यशाळेचे आयोजन विद्यापीठाच्या राजर्षी शाहू सभागृहामध्ये करण्यात आले. त्यावेळी प्रमुख पाहुणे म्हणून डॉ. हाजिक बोलत होते. प्र-कुलगुरू डॉ.डी.टी.शिर्के अध्यक्षस्थानी होते.  युएसए येथील फुलब्राईट स्कॉलर डॉ.सारा डुव्हल यांची प्रमुख उपस्थिती होती.

डॉ. हाजिक म्हणाले, शैक्षणिक संस्था आणि विद्यापीठांनी शासनाचे बंधन आहे, म्हणून नव्हे; तर दिव्यांगांप्रती सामाजिक बांधिलकी ठेवून सर्व सुविधा उपलब्ध करून देण्याचा जाणीवपूर्वक प्रयत्न केल्यास या विद्यार्थ्यांना उच्च शिक्षण घेण्यास प्रोत्साहन  मिळेल.  उच्च शिक्षण प्रणालीमध्ये ग्रंथालय हा अत्यंत महत्वपूर्ण घटक आहे. आजच्या काळात, दिव्यांग विद्यार्थ्यांसाठी डिजीटल ग्रंथालये, मोबाईल ग्रंथालये, सर्वसमावेशक ग्रंथालये, प्रवेश करण्यायोग्य ग्रंथालये असणे गरजेचे आहे. सर्व शैक्षणिक संस्था तथा महाविद्यालयांच्या ग्रंथालयांमध्ये दिव्यांगांना सहज उपलब्ध होणारे अभ्यासक्रमांचे साहित्य असले पाहिजे.

अध्यक्षीय भाषणात प्र-कुलगुरू डॉ. शिर्के म्हणाले, विद्यापीठांशी संलग्नित महाविद्यालयांनी पुढाकार घेऊन दिव्यांगासाठी सर्व सोयी-सुविधांनी सुसज्ज ग्रंथालये निर्माण करण्यासाठी प्रयत्नशील राहिले पाहिजे.  मानवतेच्या दृष्टीकोनातून आणि सामाजिक जबाबदारी म्हणून दिव्यांगांना ज्ञान प्रदान करण्यासाठी सर्व आवश्यक ते प्रयत्नही त्यांनी करायला हवेत.

याप्रसंगी सा़वित्रीबाई फुले पुणे विद्यापीठाचे धनंजय भोले, बुकशेअर इंडिया (पुणे)च्या श्रीमती झैनाब चिनीकमवाला हे तज्ज्ञ उपस्थित होते. यावेळी शैक्षणिक संस्थेतील ग्रंथालयांत दिव्यांगांसाठी पूर्णस्वरूपी सुसज्ज असे दालन तयार करण्याबाबत मार्गदर्शन करण्यात आले.

विद्यापीठाच्या ग्रंथपाल तथा रिसोर्स सेंटर फॉर इन्क्लुजिव एज्युकेशनच्या समन्वयक डॉ. नमिता खोत यांनी स्वागत व प्रास्ताविक केले. कार्यक्रम समन्वयक डॉ. डी.बी.सुतार यांनी परिचय करून दिला. संघटन सचिव डॉ. पी.बी. बिलावर यांनी आभार मानले. यावेळी डॉ. सी.ए. लंगरे, डॉ. एम.एस. वासवानी, उपकुलसचिव डॉ.एन.जे.बनसोडे, विलास सोयम यांच्यासह विविध राज्यांतील सार्वजनिक तथा महाविद्यालयीन ग्रंथपाल व दिव्यांग विद्यार्थी मोठ्या संख्येने उपस्थित होते.