डॉ. नितीन करमळकर यांनी स्वीकारली प्रभारी कुलगुरू पदाची सूत्रे

शिवाजी विद्यापीठाचे मावळते कुलगुरू डॉ. देवानंद शिंदे यांच्याकडून प्रभारी कुलगुरू पदाची सूत्रे स्वीकारताना सावित्रीबाई फुले पुणे विद्यापीठाचे कुलगुरू डॉ. नितीन करमळकर. शेजारी मावळते प्र-कुलगुरू डॉ. डी.टी. शिर्के.

कोल्हापूर, दि. १७ जून: पुणे येथील सावित्रीबाई फुले पुणे विद्यापीठाचे कुलगुरू डॉ. नितीन करमळकर यांनी आज शिवाजी विद्यापीठाच्या प्रभारी कुलगुरू पदाची सूत्रे डॉ. देवानंद शिंदे यांच्याकडून स्वीकारली.

आज दुपारी डॉ. करमळकर यांचे शिवाजी विद्यापीठात आगमन झाले. छत्रपती शिवाजी महाराज यांच्या पुतळ्यासमोर कुलसचिव डॉ. विलास नांदवडेकर यांनी त्यांचे स्वागत केले. शिवरायांच्या पुतळ्यास पुष्प वाहून अभिवादन केल्यानंतर डॉ. करमाळकर यांनी विद्यापीठाच्या मुख्य प्रशासकीय इमारतीमध्ये प्रवेश केला. कुलगुरू कार्यालयात मावळते कुलगुरू डॉ. देवानंद शिंदे यांच्याकडून त्यांनी प्रभारी कुलगुरू पदाची सूत्रे स्वीकारली. यावेळी डॉ. करमळकर यांचे बंधू व पुतणी यांच्यासह श्रीमती नागरबाई शिंदे, सौ. अनिता शिंदे, कैरवी शिंदे यांच्यासह अधिकारी उपस्थित होते.

हाडाचा शिक्षक, तळागाळात फिरून अभ्यास करणारा संशोधक, नेतृत्वगुण असलेला सक्षम प्रशासक आणि विद्यापीठाची खडा न् खडा माहिती असणारे प्राध्यापक अशी ओळख असणारे प्रभारी कुलगुरू डॉ. नितीन करमळकर हे शिवाजी विद्यापीठाचे विद्यार्थी आहेत. डॉ. करमळकर मूळचे कणकवलीचे आहेत. त्यांचा जन्म ११ जानेवारी १९६२ रोजी झाला. त्यांचे हायस्कूलसह पदवीचे शिक्षण कोल्हापूर येथे झाले आहे. शिवाजी विद्यापीठातून भूगर्भशास्त्रात बीएस्सी केल्यानंतर त्यांनी एमएस्सीसाठी पुणे विद्यापीठात प्रवेश घेतला. पुढे ‘पेट्रोग्राफी जिओकेमेस्ट्री ऑफ अल्ट्रामफाइट्स फ्रॉम पार्टस ऑफ लडाख हिमालाय (विथ रेफ्रन्स टू क्रोमॅटिक मिनरलायझेशन)’ या विषयात पीएचडी प्राप्त केली. याच विषयाशी निगडीत बाबींवर त्यांनी ऑस्ट्रेलियातील सिडनीत तसेच जर्मनीत संशोधन केले. करमळकर यांना उच्च शिक्षण क्षेत्रातील अध्यापन, प्रशासन, तसेच संशोधनाचा मोठा अनुभव आहे. पर्यावरण, भूगर्भशास्त्र, भूरसायनशास्त्र हे त्याचे संशोधनाचे विषय. राष्ट्रीय तसेच आंतरराष्ट्रीय स्तरावरील नियतकालिकांमधून त्यांचे अनेक शोधनिबंध प्रसिद्ध झाले आहेत. परदेशातील काही संस्थांबरोबर संशोधन प्रकल्पही सुरू आहेत. दगड हा त्यांचा अभ्यासाचा विषय असून, विविध प्रकारच्या अधिवासात आढळणाऱ्या दगडांवर त्यांचे संशोधन सुरू आहे. त्यांच्या कामाचा विविध संस्थांकडून आजवर गौरव करण्यात आला. पुणे विद्यापीठातील पर्यावरणशास्त्र विभागाचे प्रमुख म्हणून काम करताना ते इंटर्नल क्वालिटी अॅशुरन्स सेलचे (आयक्यूएसी) संचालक, मनुष्यबळ विकास खात्याच्या ‘रूसा’ योजनेचे समन्वयक, पर्यावरण विभागाच्या अभ्यास मंडळ आणि परीक्षा समितीचे अध्यक्ष, भूगर्भशास्त्राचे प्राध्यापक आणि शैक्षणिक मंडळाचे सदस्य अशा विविध जबाबदाऱ्या त्यांनी चोखपणे बजावल्या आहेत. विद्यापीठीय प्रशासन व्यवस्थेची सविस्तर माहिती आणि उच्च शिक्षणाची व्यापक जाण या त्यांच्या जमेच्या बाजू आहेत.

मातृसंस्थेसाठी योगदान देण्याची संधी: डॉ. करमळकर

शिवाजी विद्यापीठ ही माझी मातृसंस्था आहे. प्रभारी कुलगुरू पदाच्या जबाबदारीमुळे काही काळ मला या मातृसंस्थेची सेवा करण्याची संधी प्राप्त झाली आहे. त्या संधीचा पुरेपूर लाभ घेऊन मिळालेल्या अल्प कालावधीत अनुभवाचा फायदा करून देण्याबरोबरच विद्यापीठाचा लौकिक वृद्धिंगत करण्यासाठी सर्व संबंधित घटकांना सोबत घेऊन काम करण्यास प्राधान्य राहील, अशी प्रतिक्रिया प्रभारी कुलगुरू डॉ. नितीन करमळकर यांनी या वेळी व्यक्त केली.