शिवाजी विद्यापीठात दिव्यांगांसाठी करिअर गाईडन्स, सांस्कृतिक कार्यक्रम

शिवाजी विद्यापीठात आंतरराष्ट्रीय दिव्यांग दिनानिमित्त आयोजित कार्यक्रमात बोलताना प्र-कुलगुरू डॉ. ज्योती जाधव. मंचावर (डावीकडून) डॉ. मनोहर वासवानी, डॉ. प्रतिभा देसाई आणि बालाजी शिंदे.

 

शिवाजी विद्यापीठात आंतरराष्ट्रीय दिव्यांग दिनानिमित्त आयोजित कार्यक्रमात नृत्य सादर करताना दिव्यांग विद्यार्थिनी.

शिवाजी विद्यापीठात आंतरराष्ट्रीय दिव्यांग दिनानिमित्त आयोजित कार्यक्रमास मोठ्या संख्येने उपस्थित दिव्यांग विद्यार्थी-विद्यार्थिनी.

कोल्हापूर, दि. ७ डिसेंबर: आंतरराष्ट्रीय दिव्यांग दिनानिमित्त शिवाजी विद्यापीठातील युजीसी स्किम फॉर पर्सन्स विथ डिसॅबिलीटीज आणि समावेशी शिक्षण संसाधन केंद्र यांच्यातर्फे विद्यापीठासह संलग्नित महाविद्यालयातील दिव्यांग विद्यार्थ्यांसाठी  करियर गाईडन्स आणि सांस्कृतिक कार्यक्रमाचे आयोजन करण्यात आले. शिवाजी विद्यापीठाच्या प्रभारी प्र-कुलगुरू डॉ. ज्योती जाधव यांच्या प्रमुख उपस्थितीत हा कार्यक्रम झाला.

प्र-कुलगुरू डॉ. ज्योती जाधव म्हणाल्या, दिव्यांग विद्यार्थ्यांना विविध सोयी पुरविण्यात आणि त्यांचा मुख्य प्रवाहामध्ये समावेश करण्याच्या कामी शिवाजी विद्यापीठ अग्रेसर आहे. येथून पुढेही दिव्यांग कल्याणासाठी विद्यापीठ कार्यरत राहील.

या कार्यक्रमात इंग्रजी अधिविभागाचे डॉ. मनोहर वासवानी यांनी दृष्टीदिव्यांगासाठी कृत्रिम बुद्धिमत्तेचा वापर प्रभावीपणे कसा करावयाचा आणि आधुनिक तंत्रज्ञान आपल्या प्रगतीसाठी कसे वापरावे, याविषयी मार्गदर्शन केले. म्युझिक कौन्सिलिंगमध्येही दृष्टीदिव्यांग विद्यार्थ्यांना मोठी करिअर संधी असल्याचेही त्यांनी सांगितले. बालाजी शिंदे यांनी  बँकिंग, कॉर्पोरेट तथा अशासकीय संस्थांमध्ये दिव्यांगांसाठी असणाऱ्या संधींविषयी माहिती दिली. यानंतर झालेल्या सांस्कृतिक कार्यक्रमात हेल्पर्स ऑफ दि हॅन्डीकॅप्ड, मिरजकर तिकटी अंधशाळा, कर्णबधीर विद्यालय, कागल येथील विद्यार्थी-विद्यार्थिनींनी नृत्य व गायन सादरीकरण केले. केंद्राच्या समन्वयक डॉ. प्रतिभा देसाई यांनी संपूर्ण कार्यक्रमाचे संयोजन केले.