राहुरी कृषी विद्यापीठाच्या कुलगुरूंची शिवाजी विद्यापीठास सदिच्छा भेट

 

राहुरी कृषी विद्यापीठाचे कुलगुरू डॉ. प्रशांतकुमार पाटील यांचा सत्कार करताना शिवाजी विद्यापीठाचे कुलगुरू डॉ. डी.टी. शिर्के. सोबत प्र-कुलगुरू डॉ. पी.एस. पाटील, कुलसचिव डॉ. विलास नांदवडेकर, डॉ. ए.डी. जाधव, डॉ. व्ही.एस. मन्ने आदी.

कोल्हापूर, दि. २५ मार्च: राहुरी (अहमदनगर) येथील महात्मा फुले कृषी विद्यापीठाचे नूतन कुलगु्रु डॉ.प्रशांतकुमार पाटील यांनी काल शिवाजी विद्यापीठाचे कुलगुरु डॉ. डी.टी. शिर्के यांची सदिच्छा भेट घेतली.

कुलगुरू डॉ.पाटील मूळचे सांगली जिल्ह्यातील कवठे एकंद येथील आहेत. यापूर्वी ते भारतीय कृषी अनुसंधान परिषद येथे संचालक म्हणून कार्यरत होते. कृषी विद्यापीठ आणि शिवाजी विद्यापीठ यांच्या दरम्यान विविध विषयांच्या अनुषंगाने सामंजस्य करार करण्यास मोठी संधी असल्याचे कुलगुरू डॉ. पाटील यांनी सांगितले.

कुलगुरू डॉ. शिर्के म्हणाले, शिवाजी विद्यापीठातील प्राणीशास्त्र विभाग, रेशीमशास्त्र, जैविक कीड नियंत्रण तसेच विविध कृषी पीक किडींचा बंदोबस्त, मत्स्य विज्ञान आणि वनस्पतीशास्त्रामध्ये विविध जाती, पिके, औषधी वनस्पती, सुगंधी तेल, केळी, टिश्यू कल्चर इत्यादी बाबत संशोधन व सहकार्यास मोठा वाव आहे.  तसेच, जैवतंत्रज्ञान, ॲग्रोकेमिकल, पेस्ट मॅनेजमेंट, फूड व नॅनो सायन्समध्ये देखील संशोधन सहकार्य करता येईल.

यावेळी प्र-कुलगुरु डॉ. पी.एस. पाटील, कुलसचिव डॉ. विलास नांदवडेकर, वित्त व लेखाधिकारी व्ही. टी. पाटील, प्राणीशास्त्र अधिविभाग प्रमुख डॉ. व्ही. एस मन्ने, सेंटर ऑफ एक्सलन्स ॲन्ड इनक्युबेशनचे समन्वयक डॉ. ए. डी. जाधव आदी उपस्थित होते. यावेळी कुलगुरू डॉ. शिर्के यांनी डॉ. पाटील यांचा शाल, श्रीफळ, स्मृतिचिन्ह व ग्रंथभेट देऊन सत्कार केला.