यजमान ‘शिवाजी’सह मुंबई, औरंगाबाद व कोटा विद्यापीठाचा राष्ट्रीय स्पर्धेत प्रवेश निश्चित

नांदेडच्या खेळाडूची मुंबई संघावर आक्रमक चढाई

पुणे विद्यापीठाच्या खेळाडूची पकड करण्याच्या प्रयत्नात कोटा विद्यापीठाचे खेळाडू

शिवाजी विद्यापीठाच्या खेळाडूंनी सोलापूर विद्यापीठाच्या खेळाडूची केलेली पकड

प्रेक्षकांनी भरून गेलेली प्रेक्षकगॅलरी

पश्चिम विभागीय आंतरविद्यापीठ कबड्डी स्पर्धा:

कोल्हापूर, दि. २८ नोव्हेंबर: येथील शिवाजी विद्यापीठात सुरू असलेल्या पश्चिम विभागीय आंतरविद्यापीठ कबड्डी स्पर्धेत आज सायंकाळी झालेल्या सामन्यांमध्ये यजमान शिवाजी विद्यापीठासह मुंबई विद्यापीठ, औरंगाबादचे डॉ. बाबासाहेब आंबेडकर मराठवाडा विद्यापीठ आणि कोटा विद्यापीठ या चार संघांनी आपापल्या प्रतिस्पर्ध्यांवर विजय मिळवित राष्ट्रीय स्पर्धेतील आपला प्रवेश निश्चित केला. उद्यापासून त्यांच्यात क्रमांक निश्चितीसाठीचे सामने सुरू होतील.

यजमान शिवाजी विद्यापीठ आणि गेल्या वर्षी चौथ्या क्रमांकावरील सोलापूर विद्यापीठ यांच्यात अतिशय चुरशीने सामना सुरू झाला. तथापि, सोलापूरच्या संघातील खेळाडूंच्या आक्रमकपणाला अखिलाडू वृत्तीचे गालबोट लागले. त्यामुळे पंचांनी त्यांना दोन वेळा ग्रीन कार्ड दाखविले. त्यांच्या संघ प्रशिक्षकांनी, व्यवस्थापकांनीही खेळाडूंना समजावले. पण, त्यांच्यात फरक न पडल्याने पंचांनी एकाला यलो कार्ड दाखविले. तेव्हा पुन्हा प्रशिक्षकांनी खेळाडूंना समजावण्याचा प्रयत्न केला. पण, त्यांचे काही न ऐकता ३५-१९ अशा गुणांवर सोलापूरच्या खेळाडूंनी सामना सोडला. पंचांनी त्यांची पाच मिनिटे वाट पाहून गुणांनी आघाडीवर असलेल्या शिवाजी विद्यापीठ संघाला विजयी घोषित केले.

पुणे विद्यापीठ आणि कोटा विद्यापीठ यांच्यातील सामनाही अत्यंत चुरशीने खेळला गेला. या सामन्यात कोटा विद्यापीठाने पुण्यावर ३९-३७ असा अगदी निसटता विजय मिळविला. नांदेडचे स्वामी रामानंद तीर्थ मराठवाडा विद्यापीठ आणि मुंबई विद्यापीठ यांच्यातील सामनाही अतिशय रंगतदार झाला. मात्र, मुंबई विद्यापीठाने आक्रमक चढाईच्या जोरावर सामना ४७-३४ असा जिंकला. औरंगाबादचे डॉ. बाबासाहेब आंबेडकर मराठवाडा विद्यापीठ आणि गेल्या स्पर्धेतील विजेता असलेला शिखर येथील पंडित दीनदयाळ उपाध्याय शेखावती विद्यापीठ यांच्यातही अत्यंत अटीतटीचा सामना झाला. हा सामना औरंगाबादने ४५-४१ असा जिंकला. या चारही विजेत्या संघांचा राष्ट्रीय स्पर्धेतील प्रवेश निश्चित झाला आहे.

तत्पूर्वी, आज सकाळच्या सत्रात विविध संघांनी अत्यंत चुरशीच्या खेळाचे दर्शन घडविले. विशेषतः महाराष्ट्रातील विद्यापीठांचे प्रदर्शन जबरदस्त राहिले. शिवाजी विद्यापीठाचे दोन सामने सकाळच्या सत्रात झाले. पहिल्या सामन्यात गोवा विद्यापीठाच्या संघाला ६३-२१ असे लीलया पराभूत केले. पुढील सामन्यात शिवाजी विद्यापीठाची भोपाळच्या राजीव गांधी प्रौद्योगिकी विद्यापीठाशी लढत झाली. चुरशीने झालेल्या या सामन्यात शिवाजी विद्यापीठाने भोपाळच्या संघाला  ५४-१३ असे हरविले.

नांदेडच्या स्वामी रामानंद तीर्थ मराठवाडा विद्यापीठाच्या संघाने राजस्थानच्या भूपाल नोबल्स विद्यापीठाला ४०-११ असे पराभूत करून पुढील फेरीत प्रवेश केला. त्यांची पुढील लढत सूरतच्या वीर नर्मद दक्षिण गुजरात विद्यापीठाशी झाली. स्पर्धेतील सर्वाधिक अटीतटीचा सामना या दोन संघांत झाला. नांदेडने या सामन्यात ४५-४४ असा अवघ्या एका गुणाने निसटता विजय मिळविला.

औरंगाबादच्या डॉ. बाबासाहेब आंबेडकर मराठवाडा विद्यापीठाने जबलपूरच्या राणी दुर्गावती विद्यापीठाच्या संघाला ६८-२३ असे पराभूत केले. आणि पुढील फेरीत अमरावतीच्या संत गाडगेबाबा विद्यापीठाला ४४-२६ असे पराभूत करून पात्रता फेरीत प्रवेश केला.

नागपूरच्या राष्ट्रसंत तुकडोजी महाराज विद्यापीठाला मात्र कोटा विद्यापीठाच्या संघाकडून ५६-३१ असा पराभव पत्करावा लागला.

राष्ट्रसंत तुकडोजी महाराज नागपूर विद्यापीठ, नागपूर वि.वि. हेमचंद्राचार्य उत्तर गुजरात विद्यापीठ, पाटण (57-25), वीर नर्मद दक्षिण गुजरात विद्यापीठ, सुरत वि.वि. उत्तर महाराष्ट्र विद्यापीठ, जळगांव (36-34), शिवाजी विद्यापीठ, कोल्हापूर वि.वि. गोवा विद्यापीठ, गोवा (63-21), संत गाडगेबाबा अमरावती विद्यापीठ, अमरावती वि.वि. राजस्थान विद्यापीठ, जयपूर (34-32), कोटा विद्यापीठ, कोटा वि.वि.एल.एन.आय.पी.ई.विद्यापीठ, ग्वाल्हेर (45-17), स्वामी रामानंद तीर्थ मराठवाडा विद्यापीठ, नांदेड वि.वि. भोपाल नोबेल विद्यापीठ, राजस्थान (40-11), राजीव गांधी प्रद्योगिकी विश्वविद्यालय, भोपाल वि.वि. गोंडवाना विद्यापीठ, गडचिरोली (49-26), डॉ.बाबासाहेब आंबेडकर मराठवाडा विद्यापीठ, औरंगाबाद वि.वि. राणी दुर्गावती विश्वविद्यालय, जबलपूर (68-23), कोटा विद्यापीठ, कोटा वि.वि.राष्टसंत तुकडोजी महाराज, नागपूर (56-31), स्वामी रामानंद तीर्थ महाराज विद्यापीठ, नांदेड वि.वि. वीर नरमद दक्षीण विद्यापीठ, सुरत (45-44), शिवाजी विद्यापीठ, कोल्हापूर वि.वि. राजीव गांधी प्रोद्योगिकी विद्यापीठ, भोपाळ (54-13), डॉ.बाबासाहेब आंबेडकर मराठवाडा विद्यापीठ, औरंगाबाद वि.वि. संत गाडगेबाबा विद्यापीठ, अमरावती (44-26).

मंगळवारी (दि. २७ नोव्हेंबर) रात्री विद्युतझोतात रंगलेल्या सामन्यांचे निकाल पुढीलप्रमाणे (कंसात गुण) असे: राष्ट्रसंत तुकडोजी महाराज नागपूर विद्यापीठ, नागपूर वि.वि. भारती विद्यापीठ, पुणे (43-23), उत्तर महाराष्ट्र विद्यापीठ, जळगाव वि.वि. गुजरात टेक्नोलॉजिकल विद्यापीठ अहमदाबाद (44-31), शिवाजी विद्यापीठ, कोल्हापूर वि.वि. कडी सर्वा विश्वविद्यालय, गांधीनगर (61-13), संत गाडगेबाबा अमरावती विद्यापीठ वि.वि. देवी अहिल्या विद्यापीठ, इंदोर (36-21), कोटा विद्यापीठ, कोटा वि.वि. विक्रम विद्यापीठ, उज्जैन (54-28), भोपाल नोबल विद्यापीठ वि.वि. गुजरात विद्यापीठ (48-41), गोंडवाना विद्यापीठ, गडचिरोली वि.वि. पारुल विद्यापीठ, गुजरात (41-26), राणी दुर्गावती विश्वविदयालय, जबलपूर वि.वि. बरकतुल्लाह विद्यापीठ, भोपाल (48-43),  एल.एन.आय.पी.ई. विद्यापीठ, ग्वाल्हेर वि.वि. महाराज सूरजमल ब्रिज विश्वविद्यालय, भरतपूर (54-29), स्वामी रामानंद तीर्थ मराठवाडा विद्यापीठ, नांदेड वि.वि. मोहनलाल सुखोडिया विद्यापीठ, उदयपूर (47-17), राजीव गांधी प्रौद्योगिकी विश्वविदयालय, भोपाल वि.वि. महाराजा छत्रसाल बुंदेलखंड विद्यापीठ, छत्रपूर (59-13), डॉ. बाबासाहेब आंबेडकर मराठवाडा विद्यापीठ, औरंगाबाद वि.वि. सौराष्ट्र विद्यापीठ, राजकोट (70-20).