विविध क्षेत्रांतील तज्ज्ञांमुळे अधिसभेचा दर्जा उंचावेल: कुलगुरू डॉ. देवानंद शिंदे यांचा विश्वास

Dr. Devanand Shinde

कोल्हापूर, दि. २६ फेब्रुवारी: विविध क्षेत्रांतील तज्ज्ञांच्या समावेशामुळे शिवाजी विद्यापीठाच्या अधिसभेचा दर्जा निश्चितपणे आणखी उंचावेल, असा विश्वास कुलगुरू डॉ. देवानंद शिंदे यांनी आज येथे व्यक्त केला.

शिवाजी विद्यापीठाच्या अधिसभेची बैठक आज राजर्षी शाहू (सिनेट) सभागृहात पार पडली. त्यावेळी अधिसभा सदस्यांना संबोधित करताना ते बोलत होते.

महाराष्ट्र सार्वजनिक विद्यापीठ अधिनियम २०१६ नुसार झालेल्या निवडणुकांनंतर अधिसभेमधून अन्य अधिकार मंडळांवर निवडून द्यावयाच्या सदस्यांच्या निवडीसाठी आजची विशेष अधिसभा बोलावण्यात आली होती. नवनिर्वाचित सदस्यांनी सभागृहाला परिचय करून दिल्यानंतर कुलगुरू डॉ. शिंदे यांनी सभागृहाला संबोधित केले. ते म्हणाले, या सभागृहात शिक्षण क्षेत्रात कार्यरत असणाऱ्या व्यक्तींबरोबरच कला, साहित्य, वक्तृत्व, शेती, सहकार आदी क्षेत्रांत महत्त्वाचे आणि मोलाचे योगदान देत असलेल्या व्यक्तींचाही समावेश आहे. त्यांच्या सहभागामुळे विद्यापीठाची अधिसभा ही अधिक समग्र व सर्वसमावेशक बनली आहे. सहकार्य, संवाद आणि सहभाग या त्रिसूत्रीच्या बळावर विद्यार्थ्यांच्या आणि विद्यापीठाच्या व्यापक हिताच्या व वृद्धीच्या दृष्टीने अधिक उपयुक्त व दूरगामी निर्णय घेण्यात ही अधिसभा यशस्वी होईल, असा विश्वासही त्यांनी व्यक्त केला.

यावेळी विद्यापीठाच्या सर्व अधिकार मंडळांच्या बैठकांचे कामकाज माहिती-संवाद तंत्रज्ञानाच्या (आय.सी.टी.) सहाय्याने पूर्णतः ऑनलाईन करण्याचा मनोदय कुलगुरू डॉ. शिंदे यांनी व्यक्त केला. या कामी सर्व सदस्यांकडून सकारात्मक सहकार्य मिळेल, अशी आशाही त्यांनी व्यक्त केली. विद्यापीठ अधिकार मंडळांच्या बैठकांसाठी आदर्श संकेतसूची तयार करण्यात येईल, जेणे करून नवनियुक्त सदस्यांना सभागृहांचे संकेत माहिती होतील. तसेच, सर्व सभागृहांच्या सदस्यांसाठी लवकरच विशेष प्रशिक्षण कार्यशाळा आयोजित करण्यात येणार असल्याचेही त्यांनी सांगितले.

विद्यापीठाने प्लास्टीकमुक्तीचा संकल्प केला असल्याने सभागृहात सदस्यांना प्लास्टीकच्या बाटल्यांऐवजी स्टील किंवा काचेच्या ग्लासमधून पाणी वाटप करण्याचे ठरविले आहे. या उपक्रमासही सदस्यांनी सकारात्मक प्रतिसाद द्यावा, असे आवाहनही त्यांनी केले. त्यांच्या या आवाहनाचे सदस्यांनी टाळ्या वाजवून अभिनंदन केले.

--००--