जागतिक उत्पादन केंद्र बनण्याची क्षमता भारतात: डॉ. नारायणन

 

वेल्लोर येथील स्तुति कार्यशाळेच्या उद्घाटन प्रसंगी (डावीकडून) संचालक डॉ. ए. राजा अन्नामलाई, सहयोगी अधिष्ठाता डॉ. अरुण टॉम मॅथ्यू, डॉ. आर. जी. सोनकवडे, इस्रो (तिरुअनंतपुरम)चे समूह संचालक (मटेरिअल्स, व्हीएसएससी) डॉ. रमेश नारायणन, माजी अधिष्ठाता डॉ. आर. वासुदेवन आणि अधिष्ठाता डॉ. देवेंद्रनाथ रामकुमार.

वेल्लोर येथे ‘स्तुति’ कार्यशाळेचे उद्घाटन

कोल्हापूर/वेल्लोर, दि. ५ जुलै: भारतामध्ये सन २०३० पर्यंत वार्षिक ५०० अब्ज अमेरिकी डॉलरइतक्या उलाढालीचे जागतिक उत्पादन केंद्र बनण्याची क्षमता आहे, असे प्रतिपादन इस्रोच्या तिरुअनंतपुरम येथील विक्रम साराभाई स्पेस सेंटरचे मटेरियल मॅनेजमेंट संचालक डॉ. पी. रमेश नारायणन यांनी काल (दि. ४) वेल्लोर (तमिळनाडू) येथे केले.

भारत सरकारच्या विज्ञान व तंत्रज्ञान मंत्रालयातर्फे (डीएसटी) प्रायोजित आणि कोल्हापूर येथील शिवाजी विद्यापीठ आणि वेल्लोर इन्स्टिट्यूट ऑफ टेक्नॉलॉजी, वेल्लोर यांच्या संयुक्त विद्यमाने स्तुति (सिनर्जिस्टिक ट्रेनिंग प्रोग्रॅम अँड टेक्नॉलॉजिकल इन्फ्रास्ट्रक्चर) योजनेअंतर्गत ४ ते ११ जुलै या कालावधीत सातदिवसीय कार्यशाळेचे आयोजन करण्यात आले आहे. या कार्यशाळेच्या उद्घाटन समारंभाचे प्रमुख पाहुणे म्हणून डॉ. नारायणन बोलत होते.

डॉ. नारायणन् म्हणाले, ‘मेक इन इंडिया’ उपक्रमाच्या सहाय्याने भारत अत्याधुनिक उत्पादनांचे केंद्र म्हणून वेगाने सामोरा येतो आहे. याचे कारण म्हणजे जागतिक बलाढ्य उद्योगांनी एक तर भारतात उत्पादन प्रकल्प स्थापन केले आहेत किंवा ते स्थापन करण्याच्या प्रक्रियेत आहेत. भारत सरकार देशातील उत्पादन क्षेत्राच्या वाढीसाठी निकोप वातावरणाला प्रोत्साहन देण्यासाठी अनेक उपक्रम व योजना राबवित आहे. त्याचा नजीकच्या काळात भारताला निश्चितपणे लाभ होणार आहे. जागतिक पटलावर भारत हा एक महत्त्वाचे उत्पादन केंद्र म्हणून प्रस्थापित झाल्याचे आपल्याला पाहावयास मिळेल.

या उद्घाटन समारंभात शिवाजी विद्यापीठाच्या सैफ विभागाचे प्रमुख डॉ. आर.जी. सोनकवडे यांनी “अत्याधुनिक उपकरणे वापरून संरचनात्मक वैशिष्ट्यीकरण” या विषयावर व्याख्यान दिले. तत्पूर्वी, अधिष्ठाता डॉ. देवेंद्रनाथ रामकुमार यांनी स्वागत व प्रास्ताविक केले. सेंटर फॉर इनोव्हेटिव्ह मॅन्युफॅक्चरिंग अँड रिसर्चचे संचालक व कार्यशाळेचे समन्वयक डॉ. ए. राजा अन्नामलाई यांनी कार्यशाळेचे महत्त्व स्पष्ट केले. डॉ.आर.वासुदेवन यांनी आभार मानले.