विद्यापीठाच्या चार विद्यार्थ्यांचे स्पर्धा परीक्षेतील यश कौतुकास्पद: कुलगुरू डॉ. शिर्के

 

शिवाजी विद्यापीठाच्या स्पर्धा परीक्षा केंद्रातून महाराष्ट्र लोकसेवा आयोगाच्या परीक्षेत यश प्राप्त केलेल्या विद्यार्थ्यांच्या सत्कार प्रसंगी कुलगुरू डॉ. डी.टी. शिर्के व प्र-कुलगुरू डॉ. पी.एस. पाटील यांच्यासमवेत (डावीकडून) श्रीमती विद्या जठार, डॉ. पी.एस. कांबळे, पुजा अवघडे, अक्षय भागम, शिरीष शहापुरे, डॉ. व्ही.एन. शिंदे, अजित चौगुले.

कोल्हापूर, दि. १५ जून: शिवाजी विद्यापीठाच्या स्पर्धा परीक्षा केंद्रात अभ्यास करून ग्रामीण भागातील विद्यार्थ्यांनी प्राप्त केलेले यश कौतुकास्पद आहे. त्यांनी यापुढील काळातही उत्तुंग यश मिळवावे, असे गौरवोद्गार शिवाजी विद्यापीठाचे कुलगुरू डॉ. डी.टी. शिर्के यांनी आज येथे व्यक्त केले.

नुकताच महाराष्ट्र लोकसेवा आयोगाच्या (एमपीएससी) परीक्षेचा निकाल लागला. या परीक्षेत शिवाजी विद्यापीठाच्या युजीसी पुरस्कृत स्पर्धा परीक्षा मार्गदर्शन केंद्रातील चार विद्यार्थ्यांनी यश मिळविले. त्यांच्या गौरव समारंभात ते बोलत होते. विद्यापीठाच्या व्यवस्थापन परिषद सभागृहात झालेल्या या कार्यक्रमास प्र-कुलगुरू डॉ. पी.एस. पाटील, प्रभारी कुलसचिव डॉ. व्ही.एन. शिंदे, प्रभारी वित्त व लेखाधिकारी अजित चौगुले उपस्थित होते.

विद्यापीठाच्या स्पर्धा परीक्षा मार्गदर्शन केंद्रात दरवर्षी सर्व समाजघटकांतील विद्यार्थ्यांना प्रवेश परीक्षा घेऊन एक वर्षासाठी मोफत प्रवेश दिला जातो. अशा प्रकारे सन २०२०-२१ व २०२१-२२ या वर्षी केंद्रातील अभ्यासाच्या सोयीसुविधांचा लाभ घेऊन यंदाच्या एमपीएससी परीक्षेत चार विद्यार्थ्यांनी यश मिळविले. यामध्ये अक्षय भागम (कोदे, ता. शाहूवाडी) याची महाराष्ट्र अभियांत्रिकी सेवेमध्ये सहाय्यक अभियंता या वर्ग-१च्या पदावर, रविकुमार पाटील (मुधाळ) यांची पी.एस.आय. पदी आणि शिरीष शहापुरे (हासूर, ता. शिरोळ) व पुजा अवघडे (कोल्हापूर) या दोघांची नायब तहसीलदारपदी निवड झाली. आज या विद्यार्थ्यांचा विद्यापीठाच्या वतीने स्मृतिचिन्ह व ग्रंथ भेट देऊन कुलगुरू डॉ. शिर्के व प्र-कुलगुरू डॉ. पाटील यांच्या हस्ते गौरव करण्यात आला.

यावेळी आपल्या मनोगतामध्ये विद्यार्थ्यांनी आपल्या यशामध्ये शिवाजी विद्यापीठाचा महत्त्वाचा वाटा असल्याचे सांगितले. छत्रपती शिवाजी महाराजांचा आदर्श घेऊन सदोदित लोकाभिमुख काम करण्याचा प्रयत्न राहील, अशी ग्वाही त्यांनी यावेळी दिली.

यावेळी प्र-कुलगुरू डॉ. पाटील यांच्यासह कुलसचिव डॉ. शिंदे आणि वित्त व लेखाधिकारी श्री. चौगुले यांनीही विद्यार्थ्यांना मार्गदर्शन केले. केंद्राचे समन्वयक डॉ. पी.एस. कांबळे यांनी प्रास्ताविक व परिचय करून दिला. यावेळी जनसंपर्क अधिकारी डॉ. आलोक जत्राटकर, तेजपाल मोहरेकर आदी उपस्थित होते.