‘खेलो इंडिया’ आंतरविद्यापीठ स्पर्धेतील पदकविजेत्यांचा विद्यापीठात गौरव

दुसऱ्या खेलो इंडिया आंतरविद्यापीठ स्पर्धेतील पदकविजेते क्रीडापटू, प्रशिक्षक आणि संघ व्यवस्थापक यांच्यासमवेत कुलगुरू डॉ. डी.टी. शिर्के, प्र-कुलगुरू डॉ. पी.एस. पाटील, प्रभारी कुलसचिव डॉ. व्ही.एन. शिंदे आणि डॉ. पी.टी. गायकवाड.

कोल्हापूर, दि. २ जून: विद्यापीठाच्या क्रीडापटूंनी कोविड-१९च्या कालखंडानंतर दुसऱ्या खेलो इंडिया स्पर्धेत बजावलेली कामगिरी उत्साहवर्धक असून पुढील काळातही स्पर्धेगणिक त्यांची कामगिरी उंचावत राहावी, अशा सदिच्छा शिवाजी विद्यापीठाचे कुलगुरू डॉ. डी.टी. शिर्के यांनी व्यक्त केल्या.

द्वितिय राष्ट्रीय खेलो इंडिया आंतरविद्यापीठ स्पर्धेत विविध क्रीडाप्रकारांत पदक प्राप्त करणाऱ्या क्रीडापटूंचा गौरव समारंभ काल (दि. १ जून) बॅ. बाळासाहेब खर्डेकर ज्ञानस्रोत केंद्राच्या सभागृहात झाला. त्यावेळी ते बोलत होते.

कुलगुरू डॉ. शिर्के म्हणाले, विद्यापीठाच्या क्रीडापटूंनी त्यांच्या समस्यांची सोडवणूक करण्याची बाब विद्यापीठाकडे सोपवावी आणि आपले संपूर्ण लक्ष खेळ आणि गुणवत्ता सुधारण्यावर केंद्रित करावे. विद्यापीठ प्रशासन त्यांना आवश्यक त्या सोयीसुविधा उपलब्ध करून देण्यास सर्वोतोपरी प्रयत्नशील आहे, अशी ग्वाही त्यांनी दिली.

दुसऱ्या खेलो इंडिया स्पर्धेमध्ये विविध क्रीडाप्रकारांत शिवाजी विद्यापीठाच्या ८६ क्रीडापटूंनी सहभाग घेतला. त्यामध्ये ८ सुवर्ण, ७ रौप्य आणि ७ कांस्य अशी एकूण २२ पदके प्राप्त केली. या पदकप्राप्त क्रीडापटूंना कुलगुरू डॉ. शिर्के आणि प्र-कुलगुरू डॉ. पी.एस. पाटील यांच्या हस्ते विद्यापीठाचे स्मृतिचिन्ह देऊन गौरविण्यात आले.

विद्यापीठाच्या क्रीडा अधिविभागाचे प्रमुख डॉ. पी.टी. गायकवाड यांनी स्वागत व प्रास्ताविक केले. प्रभारी कुलसचिव डॉ. व्ही.एन. शिंदे यांनी आभार मानले. कार्यक्रमास क्रीडापटूंसह त्यांचे प्रशिक्षक, संघ व्यवस्थापक आणि पालक उपस्थित होते. 

स्पर्धेतील पदकविजेत्यांची नावे (कंसात अनुक्रमे क्रीडाप्रकार व पदक) अशी-

वैयक्तिक क्रीडाप्रकार: तेजस दत्तात्रय जोंधळे (वेटलिफ्टिंग, सुवर्ण), साक्षी महेश रानमळे (वेटलिफ्टिंग, सुवर्ण), सरिता सुनील सावंत (वेटलिफ्टिंग, रौप्य), प्रतीक्षा बाळू साठे (वेटलिफ्टिंग, कांस्य), ऋतुजा वीरधवल खाडे (स्विमिंग, तीन सुवर्ण (५० मी. फ्रीस्टाईल, १०० मी. फ्रीस्टाईल व ५० मी. बटरफ्लाय)), गौरव विठोबा चव्हाण (स्विमिंग, कांस्य), धनंजय राजाराम जाधव (तलवारबाजी, कांस्य), ऋषीकेश उत्तम पाटील (फ्रीस्टाईल कुस्ती, कांस्य), नंदिनी बाजीराव साळोखे (फ्रीस्टाईल कुस्ती, कांस्य), रोहन गौतम कांबळे (अॅथलेटिक्स (४० मी अडथळे), सुवर्ण), विकास आनंदा खोडके (अॅथलेटिक्स (११० मी. अडथळे), सुवर्ण), सिद्धांत सुरेश पुजारी (अॅथलेटिक्स (३००० मी. स्टेपल्स चेस), कांस्य), स्नेहा सूर्यकांत जाधव (अॅथलेटिक्स (हातोडाफेक), कांस्य), ज्ञानेश्वरी जयवीर (नेमबाजी, कांस्य).

सांघिक: योगा (पुरूष): मनन नरेंद्रकुमार कासलीवाल, अभिजीत तात्यासो सावंत, अनिकेत अरुण म्हेत्रे, ऋषीराज बापूसो माने, घननीळ दादाराव लोंढे आणि ओंकार विष्णू दाभोळे (सर्वांना रौप्य).