कोल्हापूर, दि. ३१ ऑगस्ट: शिवाजी
विद्यापीठाच्या सुरक्षा विभागाच्या ताफ्यात आज एक नवीन वाहन दाखल झाले. कुलगुरू
डॉ. देवानंद शिंदे यांनी स्वतःच हे वाहन चालवून त्याची चाचणी घेतली.
शिवाजी विद्यापीठाच्या सुरक्षा विभागात पेट्रोलिंगसाठी एक आधुनिक
मोटार कार्यरत आहे. तथापि, त्या वाहनाची निर्लेखनाची मुदत जवळ आली असल्याने नवीन
वाहन घेण्याची आवश्यकता होती. त्यानुसार आज एक नवीन जीप विद्यापीठाच्या वाहन
ताफ्यात दाखल झाली. या प्रसंगी प्रभारी कुलसचिव डॉ. व्ही.एन. शिंदे, बीसीयुडी
संचालक डॉ. डी.आर. मोरे, प्रभारी वित्त व लेखाधिकारी अजित चौगुले, राष्ट्रीय सेवा
योजना समन्वयक डॉ. डी.के. गायकवाड, सुरक्षा विभागाचे उपकुलसचिव संजय कुबल, डॉ.
गिरीश कुलकर्णी, विभा अंत्रेडी, सुरक्षा अधिकारी वसंत एकले यांच्यासह अधिकारी व
सेवक उपस्थित होते.
दरम्यान, कुलगुरू डॉ. शिंदे यांनी नवीन वाहनाचे सारथ्य
स्वतः करीत अधिकाऱ्यांना विद्यापीठ परिसराची छोटी सैर घडविली.
'ओळखपत्र बंधनकारक'
विद्यापीठाची सुरक्षा व्यवस्था कडक करण्याचे निर्देश
कुलगुरू डॉ. शिंदे यांनी काल अधिकाऱ्यांच्या बैठकीत दिले. त्यानुसार विद्यापीठातील
प्रत्येक शिक्षक, अधिकारी, प्रशासकीय सेवक आणि विद्यार्थी यांना विद्यापीठ परिसरात
वावरताना सोबत ओळखपत्र बाळगणे बंधनकारक करण्यात आले आहे. या आदेशाच्या अंमलबजावणीची
सुरवात कुलगुरूंनी स्वतःपासूनच केली. कुलगुरूंच्या गळ्यातील ओळखपत्र पाहून या
आदेशाचे गांभीर्य पटून अन्य कर्मचाऱ्यांनीही आपापली ओळखपत्रे गळ्यात अडकवली.
