३२०० विद्यार्थ्यांना कौशल्य प्रशिक्षण; ४५० हून अधिक जणांना नामांकित कंपन्यांत रोजगार संधी

शिवाजी विद्यापीठाच्या मध्यवर्ती रोजगार कक्षाची कामगिरी

 

शिवाजी विद्यापीठाच्या मध्यवर्ती रोजगार कक्षातर्फे आयोजित एका कॅम्पस ड्राईव्हसाठी मोठ्या संख्येने उपस्थित असणारे विद्यार्थी-विद्यार्थिनी. (फाईल फोटो)

शिवाजी विद्यापीठाच्या मध्यवर्ती रोजगार कक्षातर्फे आयोजित एका कॅम्पस ड्राईव्हअंतर्गत ऑनलाईन परीक्षा देणाऱ्या विद्यार्थिनी. (फाईल फोटो)

कोल्हापूर, दि. २७ जून: शिवाजी विद्यापीठाच्या मध्यवर्ती रोजगार कक्षाने गत वर्षभरात प्रभावी कामगिरीची नोंद करीत एकूण ७४ विविध कौशल्य विकास प्रशिक्षण कार्यक्रम राबविले, त्या माध्यमातून विद्यापीठासह संलग्नित महाविद्यालयांतील ३२०० विद्यार्थ्यांना प्रशिक्षित केले. त्याच बरोबर ४५० हून अधिक विद्यार्थ्यांना नामांकित उद्योग, व्यवसायांमध्ये रोजगार संधीही उपलब्ध करून देण्यात यश प्राप्त केले आहे.

विद्यापीठाच्या मध्यवर्ती रोजगार कक्षाच्या गत वर्षभरातील कामगिरीविषयी जाणून घेण्यासाठी कक्षाचे समन्वयक डॉ. राजन पडवळ यांच्याशी संपर्क साधला असता त्यांनी ही माहिती दिली.

डॉ. पडवळ यांनी दिलेल्या माहितीनुसार, शिवाजी विद्यापीठ विद्यार्थ्यांना रोजगारक्षम बनविण्यासाठी मध्यवर्त रोजगार कक्षाच्या माध्यमातून अविरत प्रयत्नशील आहे. विद्यार्थी नोकरीक्षम बनण्यासाठी त्यांच्यात निरनिराळ्या कौशल्यांची वृद्धी करणे आवश्यक असते, हे लक्षात घेऊन कक्षाने त्यांना प्रशिक्षणासाठी वर्षभराचे वेळापत्रक आखले. त्यानुसार पूर्ण वर्षभरात एकूण ७४ प्रशिक्षण कार्यक्रम आयोजित केले आणि त्या माध्यमातून ३२०० विद्यार्थ्यांना प्रशिक्षित केले. या प्रशिक्षणामध्ये रिझ्युमे लिहिणे, मुलाखतीचे तंत्र, कॉर्पोरेट कल्चर अशा अनेकविध बाबींचा समावेश होता. त्याचबरोबर विद्यार्थ्यांचे मॉक इंटरव्ह्यू घेऊन त्यांच्या मनातील मुलाखतीविषयी असणारी भीती नष्ट केली. परिणामी, सन २०२४- २०२५ या शैक्षणिक वर्षात शिवाजी विद्यापीठातील ४५० हून अधिक विद्यार्थ्यांना विविध नामांकित कंपन्यांत रोजगार संधी प्राप्त झाल्या आहेत. यामध्ये इन्फोसिस, अॅक्सिस बँक, एन.पी.सी.आय., अदानी समूह, अमूल इंडिया, गद्रे मरिन एक्स्पोर्ट्स, टॅको इत्यादी प्रथितयश कंपन्यांचा समावेश आहे. मध्यवर्ती रोजगार कक्षाने आतापर्यंत १२५ विविध नामवंत कंपन्यांना आमंत्रित करून कॅम्पस रिक्रुटमेंट ड्राईव्हचे आयोजन केले आहे. यातील काही कंपन्या पुनश्च: रिक्रुटमेंट ड्राईव्ह घेण्यास उत्सुक आहेत.

शिवाजी विद्यापीठ आपल्या परिक्षेत्रातील विद्यार्थ्यांच्या सर्वांगीण विकासासाठी कटिबद्ध असून त्यांना विविध कौशल्याधारित प्रशिक्षणांमधून रोजगारक्षम बनवले जावे, यासाठी कुलगुरू डॉ. दिगंबर शिर्के, प्र-कुलगुरू डॉ. प्रमोद पाटील आणि कुलसचिव डॉ. विलास शिंदे यांच्यासह सर्वच अधिकारी आणि अधिकार मंडळे यांच्या सहकार्याने आवश्यक ते उपक्रम वर्षभर नियमितपणे राबविले जातात. त्यामुळे देशातील आघाडीच्या कंपन्या रिक्रूटमेंट ड्राईव्हसाठी येत आहेत, ही आनंदाची बाब असल्याची प्रतिक्रियाही डॉ. पडवळ यांनी व्यक्त केली.