विद्यापीठाच्या ‘बांध’ एकांकिकेचे विविध स्पर्धांत यश

तंत्रज्ञान अधिविभागात कौतुकाचा वर्षाव

'बांध' एकांकिकेमधील कलाकार विद्यार्थ्यांचे अभिनंदन करताना तंत्रज्ञान अधिविभागाचे संचालक डॉ. अजित कोळेकर.

शिवाजी विद्यापीठाच्या 'बांध' एकांकिकेने महाराष्ट्रातील विविध नामांकित स्पर्धांमध्ये भरीव यश प्राप्त केले.

कोल्हापूर, दि. २७ जून: तंत्रज्ञान अधिविभागाच्या कलासंपन्न विद्यार्थ्यांनी ‘बांध’ या एकांकिकेच्या माध्यमातून सृजनशीलता आणि सांघिक भावना जोपासल्यानेच त्यांना विविध स्पर्धांत घवघवीत यश संपादन करता आले, असे कौतुकोद्गार अधिविभागाचे संचालक डॉ. अजित कोळेकर यांनी काढले.

शिवाजी विद्यापीठाच्या तंत्रज्ञान अधिविभागातील विद्यार्थ्यांनी सादर केलेल्या “बांध” या एकांकिकेने या वर्षी विविध नामवंत सांस्कृतिक स्पर्धांमध्ये दर्जेदार कामगिरीचे प्रदर्शन करीत उल्लेखनीय यश मिळविले आहे. अधिविभागाच्या सांस्कृतिक विभागाच्या वतीने सादर झालेल्या या एकांकिकेने जी.एस.  रायसोनी करंडक, पुरुषोत्तम करंडकासह मनोरंजन करंडक, सकाळ करंडक, लोकसत्ता लोकांकिका करंडक अशा प्रतिष्ठित स्पर्धांमध्ये भाग घेत प्रभावी ठसा उमटवला. त्या निमित्ताने या विद्यार्थ्यांचा अधिविभागात गुणगौरव करण्यात आला. त्यानिमित्त डॉ. कोळेकर बोलत होते.

डॉ. कोळेकर म्हणाले, अभियांत्रिकीचे विद्यार्थी असूनही कलागुणसंपन्नतेचे उत्तम प्रदर्शन घडविले आहे. हे यश केवळ स्पर्धात्मक नाही, तर विद्यार्थ्यांच्या सर्वांगीण व्यक्तिमत्व विकासाचेही उदाहरण आहे. सादरीकरण, अभिनय, संगीत, आणि प्रकाश योजना यांचा सुंदर मिलाफ साधत “बांध” एकांकिकेने प्रेक्षकांसह परीक्षकांचीही मने जिंकली. तंत्रज्ञान अधिविभागासह विद्यापीठाला या गुणवत्तापूर्ण सादरीकरणाचा अभिमान आहे.

या एकांकिकेमध्ये दृप्ता कुलकर्णी, वेदांत मोरे, नेहा सावंत, ज्ञानेश पाटील, शुभम भिलारे, श्रीधर निंबाळकर, वेदांत कारंडे, साक्षी जाधव, गणेश मडिवाल, भूषण चांदणे, हर्षदा लोंढे, श्रुतिका शेळके, हर्षिता परब, पूर्वा सावंत, रेणुका घरात, सौरभ जगताप या कलाकार विद्यार्थ्यांनी विविध भूमिका केल्या आहेत.

या एकांकिकेने सांघिक स्तरावर जी.एस. रायसोनी करंडक (विभागीय द्वितीय क्रमांक), सकाळ करंडक (द्वितीय क्रमांक) आणि लोकसत्ता लोकांकिका करंडक (द्वितीय क्रमांक) असे यश प्राप्त केले आहे. तर, वैयक्तिक गटात दृप्ता कुलकर्णी (वाचिक अभिनय- पुरुषोत्तम करंडक, उत्कृष्ट अभिनेत्री - सकाळ व लोकसत्ता करंडक), नेहा सावंत – उत्कृष्ट अभिनेत्री प्रमाणपत्र (पुरुषोत्तम करंडक), ज्ञानेश पाटील, शुभम भिलारे (उत्कृष्ट प्रकाश योजना- सकाळ व लोकसत्ता करंडक) आणि वेदांत कारंडे (उत्कृष्ट पार्श्वसंगीत- लोकसत्ता करंडक).