कोविड लसीकरणाला विद्यापीठाचा प्रतिसाद; ९९ टक्क्यांहून अधिकांचे लसीकरण

 

शिवाजी विद्यापीठातर्फे जनहितार्थ प्रकाशित केलेल्या आवाहनाचे बॅनर्स

कोल्हापूर, दि. ११ जानेवारी: शिवाजी विद्यापीठात कार्यरत असणाऱ्या शिक्षक व शिक्षकेतर कर्मचाऱ्यांनी कोविड-१९विषयक लसीकरणाला शासनाने केलेल्या आवाहनानुसार जवळपास १०० टक्के सहभाग दर्शविला आहे. पहिला अगर दोन्ही डोस घेणाऱ्या शिक्षकांची व शिक्षकेतर कर्मचाऱ्यांची संख्या अनुक्रमे ९७ व ९९ टक्क्यांहून अधिक आहे. कोविड-१९ साथीच्या तिसऱ्या लाटेच्या पार्श्वभूमीवर शिवाजी विद्यापीठ प्रशासनाकडून शिक्षक आणि शिक्षकेतर कर्मचाऱ्यांच्या लसीकरणाची माहिती मागविली. त्यातून ही समाधानकारक बाब समोर आल्याची माहिती प्रभारी कुलसचिव डॉ. व्ही.एन. शिंदे यांनी दिली.

डॉ. शिंदे यांनी दिलेल्या माहितीनुसार, केंद्र सरकार तसेच महाराष्ट्र शासन यांनी कोविड-१९ महामारीच्या पार्श्वभूमीवर नागरिकांना लसीकरण करून घेण्यासंदर्भात आवाहन केले. त्यानुसार शिवाजी विद्यापीठ प्रशासनानेही आपल्या सर्व शिक्षक व शिक्षकेतर कर्मचाऱ्यांना लसीकरण करवून घेण्याचे आवाहन केलेच, शिवाय कोल्हापूर महानगरपालिकेच्या आरोग्य विभागाच्या सहकार्याने विद्यापीठाच्या आरोग्य केंद्रामध्ये वेळोवेळी लसीकरण शिबीरेही आयोजित केली. याचे चांगले परिणाम दिसून आले. सर्वांनीच या आवाहनाला प्रतिसाद देत लसीकरण करवून घेण्यास प्राधान्य दिले. विद्यापीठ प्रशासनाने लसीकरणासंदर्भातील माहिती सर्व अधिविभाग, अध्यासने, केंद्रे आणि प्रशासकीय विभागांकडून संकलित केली. या माहितीच्या विश्लेषणातून सदर बाब सामोरी आली.

विद्यापीठात कार्यरत २६० शिक्षकांपैकी २१६ जणांनी (८३.०७%) दोन्ही डोस घेतलेले आहेत, तर ३७ जणांनी (१४.२३%) पहिला डोस घेतला असून दुसऱ्या डोससाठी मुदतपूर्तीच्या प्रतीक्षेत आहेत. विद्यापीठातील एकूण ५३४ शिक्षकेतर कर्मचाऱ्यांपैकी ४६८ (८७.६४%) जणांनी दोन्ही डोस घेतले असून ६२ जण (११.६१%) पहिला डोस घेऊन दुसऱ्या डोससाठी मुदतपूर्तीच्या प्रतीक्षेत आहेत.

एकही डोस न घेतलेल्या शिक्षकांची संख्या ७ तर, शिक्षकेतर कर्मचाऱ्यांची संख्या अवघी ४ आहे. यातील काही जण कोविड पॉझिटिव्ह होते, तर काहींनी वैद्यकीय कारणास्तव लस घेतलेली नाही. तथापि, वैद्यकीय सल्ल्यानंतर लसीकरणासंदर्भात निर्णय घेऊ, असे त्यांनी प्रशासनाला कळविले आहे, अशी माहिती कुलसचिव डॉ. शिंदे यांनी दिली.

...तरीही गाफील राहू नका, दक्षता घ्या: कुलगुरू डॉ. शिर्के

एक टक्क्याहून कमी असलेल्या या उर्वरित लोकांनी वैद्यकीय सल्ल्यानुसार आपले लसीकरण करून घ्यावे. तसेच, ज्यांचे लसीकरण झाले आहे, त्यांनीही सदर लाटेमध्ये गाफील न राहता मास्क, सुरक्षित अंतर, सॅनिटायझरचा वापर आदी दक्षता घेऊन स्वतःसह कुटुंबियांना व त्यायोगे समाजालाही सुरक्षित ठेवावे. अभ्यागतांनीही या दक्षतेच्या कालखंडात शक्यतो विद्यापीठ कार्यालयात प्रत्यक्ष येण्याचे टाळून ई-मेल, दूरध्वनी आदी साधनांच्या सहाय्याने विद्यापीठ प्रशासनाशी संपर्क साधावा, असे आवाहन कुलगुरू डॉ. डी.टी. शिर्के यांनी केले आहे.