गोविंदराव सासने यांचे कार्य नव्या पिढीला प्रेरक: डॉ. जयसिंगराव पवार

 

'गोविंदराव सासने यांच्या आठवणी' या पुस्तिकेचे प्रकाशन करताना श्रीमंत शाहू महाराज. सोबत (डावीकडून) डॉ. अवनिश पाटील, डॉ. रणधीर शिंदे, डॉ. जयसिंगराव पवार, डॉ. व्ही.एन. शिंदे, डॉ. नंदकुमार मोरे आदी.

 

कोल्हापूर, दि. ४ जानेवारी: गोविंदराव सासने यांच्यासारख्या पुरोगामी समाजसुधारकाचे कार्य ‘गोविंदराव सासने यांच्या आठवणी’ या पुस्तिकेच्या रूपाने आज पुढे येत आहे. सासने यांचे कार्य आजच्या पिढीला प्रेरक आहे, असे गौरवोद्गार डॉ. जयसिंगराव पवार यांनी काल (दि. ३) येथे काढले.

शिवाजी विद्यापीठाच्या महर्षी विठ्ठल रामजी शिंदे अध्यासनाच्या वतीने महर्षी शिंदे यांच्या स्मृतिदिनानिमित्त आयोजित 'गोविंदराव सासने यांच्या आठवणी' या पुस्तिकेच्या प्रकाशन समारंभात ते अध्यक्षस्थानावरुन बोलत होते.

अध्यक्षीय मनोगतात डॉ. पवार यांनी अशी चरित्रे अर्वाचीन सामाजिक इतिहासाचे साधन म्हणून महत्त्वपूर्ण असल्याचे नमूद केले. तसेच इतिहास संशोधन आणि ऐतिहासिक चरित्राच्या संशोधनातील सूक्ष्म बारकावे याबद्दल मार्गदर्शनपर विचार व्यक्त केले.

‘गोविंदराव सासने यांच्या आठवणी’ या पुस्तिकेचे प्रकाशन श्रीमंत छत्रपती शाहू महाराज यांच्या हस्ते झाले. यावेळी श्रीमंत छत्रपती शाहू महाराज यांनी शाहू महाराजांचा सुधारणेचा वारसा आणि गोविंदराव सासने यांच्या कार्याविषयी विचार मांडले.

महर्षी विठ्ठल रामजी शिंदे तसेच सावित्रीबाई फुले यांच्या प्रतिमेला मान्यवरांच्या हस्ते पुष्प अर्पण करून समारंभाची सुरवात झाली. महर्षी विठ्ठल रामजी शिंदे अध्यासनाचे समन्वयक डॉ. रणधीर शिंदे यांनी प्रास्ताविक व पुस्तिका निर्मितीसाठी भूमिका सांगितली.

शिवाजी विद्यापीठाचे प्रभारी कुलसचिव डॉ. व्ही. एन. शिंदे यांनी पाश्चात्य ऐतिहासिक चरित्र लेखनाबाबत आपले विचार व्यक्त केले. डॉ. अवनीश पाटील यांनी कोल्हापूरच्या ऐतिहासिक स्थळांचे, प्रबोधन चळवळींची केंद्रस्थाने जतन करण्याचे तसेच कोल्हापुरातील सामाजिक चळवळी आणि दुर्लक्षित इतिहास नव्याने लोकांसमोर येण्याचे महत्व प्रतिपादन केले. प्रा. अजित सूर्यवंशी यांनी गोविंदराव सासने यांच्या आठवणी सांगितल्या.

यावेळी सासने यांच्या कुटुंबियांपैकी प्रा. अजित सूर्यवंशी, बाळासाहेब सूर्यवंशी, स्वजिता घोडके, मेघना कामत, जया कामत या उपस्थित होत्या. समारंभासाठी प्रा. प्रभंजन माने, प्रा. अरुण शिंदे, विभागातील विद्यार्थी व संशोधक विद्यार्थी उपस्थित होते. प्रा. डॉ. नंदकुमार मोरे यांनी परिचय करून दिला. डॉ. सुखदेव एकल यांनी आभार मानले, तर सुस्मिता खुटाळे यांनी सूत्रसंचालन केले.