मराठी समाजशास्त्र परिषदेकडून डॉ. जगन कराडे यांना दोन पुरस्कार

 

रत्नागिरी येथे मराठी समाजशास्त्र परिषदेतर्फे डॉ. जगन कराडे यांना पुरस्कार प्रदान करताना डॉ. पी.जी. जोगदंड. सोबत प्राचार्य डॉ. पी.पी. कुलकर्णी आणि परिषदेचे अध्यक्ष डॉ. नारायण कांबळे.

कोल्हापूर, दि. १३ एप्रिल: शिवाजी विद्यापीठाच्या समाजशास्त्र अधिविभागाचे प्रमुख डॉ. जगन कराडे यांना मराठी समाजशास्त्र परिषदेचे दोन पुरस्कार प्राप्त झाले आहेत. काल (दि. १२) रत्नागिरी येथे पुरस्कार प्रदान सोहळा पार पडला.

मराठी समाजशास्त्र परिषदेने या वर्षापासून महाराष्ट्रातील समाजशास्त्र या विषयात शैक्षणिक भर घालणाऱ्या प्राध्यापकास डॉ. प्रदीप आगलावे उत्कृष्ट संशोधक/ प्राध्यापक पुरस्कार तसेच आय.सी. एस. एस. आर. व विद्यापीठ अनुदान आयोग पुरस्कृत संशोधक ग्रंथास डॉ. सूर्यकांत घुगरे संशोधक ग्रंथ पुरस्कार देण्यात येत आहे. पहिल्या पुरस्कारासाठी स्वतः डॉ. कराडे तर दुसऱ्या पुरस्कारासाठी त्यांचे ‘ऑक्युपेशनल मोबीलिटी अमंग शेड्युल्ड कास्ट’ पुस्तक पात्र ठरले.

परिषदेचे ३१वे राष्ट्रीय अधिवेशन दि. ११ व १२ एप्रिल २०२२ रोजी रत्नागिरीच्या आर.टी. गोगटे कला व विज्ञान आणि आर.व्ही. जोगळेकर वाणिज्य महाविद्यालयात पार पडले. त्यावेळी डॉ. कराडे यांना ज्येष्ठ समाजसास्त्रज्ञ डॉ. पी.जी. जोगदंड यांच्या हस्ते हे पुरस्कार प्रदान करण्यात आले. यावेळी प्राचार्य डॉ. पी.पी. कुलकर्णी आणि परिषदेचे अध्यक्ष डॉ. नारायण कांबळे हेही उपस्थित होते.

डॉ.कराडे यांचे राष्ट्रीय आणि आंतराराष्ट्रीय पातळीवर बारा संशोधनात्मक ग्रंथ प्रकाशित झाले आहेत. यातील दोन ग्रंथ केंब्रीज स्कॉलर पब्लिकेशन, लंडन येथून प्रकाशित झाले आहेत. महाराष्ट्रात कार्यरत असलेल्या मराठी समाजशास्त्र परिषदेचे अध्यक्षस्थान त्यांनी भूषविले आहे. देशातील समाजशास्त्रज्ञांची शिखर संस्था असलेल्या अत्यंत प्रतिष्ठित अशा भारतीय समाजशास्त्र संस्थेच्या (इंडियन सोशियॉलॉजीकल सोसायटी, नवी दिल्ली) ते सदस्य (२०१३- २०१९) तसेच सचिवपदीही (२०२०-२०२१) कार्य केलेले आहे. त्यांनी व्हिएन्ना (ऑस्ट्रिया), टोरोंटो (कॅनडा) व तैपेई (तैवान) येथे झालेल्या आंतराराष्ट्रीय परिषदांमध्येही सहभागी होऊन त्यांनी शोधनिबंध सादर केले आहेत. टोरोंटो आंतराराष्ट्रीय परिषदेत डब्ल्यूजी-०५ (फॅमिनियन अँड सोसायटी) या संशोधन समितीच्या २०१८ ते २०२२ या कालावधीकरिता संशोधन समिती कार्यकारिणीवर सदस्य म्हणूनही ते कार्यरत आहेत. शिवाजी विद्यापीठात २०१९ साली झालेल्या आंतरराष्ट्रीय समाजशास्त्र परिषदेचे डॉ. कराडे यांनी अत्यंत यशस्वी आयोजन केले. या परिषदेत आठ माजी कुलगुरूंसह जगभरातून सुमारे २५० समाजशास्त्रज्ञ सहभागी झाले होते.