पाचगणीत शिवाजी विद्यापीठाचे नेतृत्व विकास शिबिर सुरू

पाचगणी येथील बहाई अकादमीमध्ये शिवाजी विद्यापीठाच्या नेतृत्व विकास शिबिराचे उद्घाटन करताना प्र-कुलगुरू डॉ. प्रमोद पाटील. सोबत (डावीकडून) डॉ. प्रल्हाद माने, डॉ. तानाजी चौगुले आणि डॉ. लेसन आझादी

पाचगणी येथील बहाई अकादमीमध्ये शिवाजी विद्यापीठाच्या नेतृत्व विकास शिबिरात मार्गदर्शन करताना प्र-कुलगुरू डॉ. प्रमोद पाटील. 

पाचगणी येथील बहाई अकादमीमध्ये शिवाजी विद्यापीठाच्या नेतृत्व विकास शिबिरासाठी आलेले विद्यार्थी-विद्यार्थिनी. 

कोल्हापूर, दि. ५ फेब्रुवारी: शिवाजी विद्यापीठाच्या विद्यार्थी विकास विभागाच्या वतीने पाचगणी (जि. सातारा) येथील बहाई अकादमी येथे नेतृत्व विकास शिबीर आजपासून सुरू झाले. विद्यापीठाचे प्र-कुलगुरू डॉ. प्रमोद पाटील यांच्या हस्ते शिबिराचे आज सकाळी उद्घाटन करण्यात आले. शिबिरात एकूण ८२ विद्यार्थी-विद्यार्थिनी सहभागी झाले आहेत.

विद्यार्थ्यांच्या नेतृत्व गुणांना वाव देण्यासाठी आणि एकूणच त्यांच्या व्यक्तिमत्व विकासासाठी विद्यापीठाच्या वतीने दरवर्षी नेतृत्व विकास शिबिराचे आयोजन दरवर्षी करण्यात येते. कोल्हापूर, सांगली, सातारा जिल्ह्यातील महाविद्यालयांमधून तसेच शिवाजी विद्यापीठाच्या विविध अधिविभागांतून ८२ विद्यार्थी शिबिरात सहभागी झाले आहेत.

विद्यार्थ्यांना त्यांच्यातील सुप्त गुणांची जाणीव करून देण्यासाठी तसेच कालसुसंगत बाबींच्या परिचय करून देण्यासाठी शिबिरामध्ये अनेक मान्यवर तज्ज्ञांची मार्गदर्शनपर व्याख्याने आयोजित केली आहेत. व्याख्यानांबरोबरच कृती कार्यक्रम तसेच बहाई अकॅडमीच्या वतीने ‘हॅप्पी हिप्पो शो’चे आयोजन करण्यात आले आहे. रोज सकाळी मॉर्निंग वॉक, योगा, प्राणायाम यांनी शिबिराची सुरुवात होते. उद्घाटन प्रसंगी बहाई अकॅडमीचे संचालक डॉ. लेसन आजादी, विद्यापीठाच्या विद्यार्थी विकास विभागाचे संचालक डॉ. तानाजी चौगले, शिबिर समन्वयक डॉ. प्रल्हाद माने तसेच विद्यार्थी विकास विभागाचे कर्मचारी उपस्थित होते. शिबिराची सांगता ७ फेब्रुवारी रोजी कुलगुरू डॉ. दिगंबर शिर्के यांच्या प्रमुख उपस्थितीत होईल.