'शिवाजी विद्यापीठ परिसर आणि कोल्हापुरी पाहुणचाराच्या प्रेमात पडलो' गौरव समारंभात पंजाबच्या विद्यार्थ्यांची भावपूर्ण प्रतिक्रिया

पंजाबच्या लव्हली प्रोफेशनल विद्यापीठाच्या संघाचा छत्रपती शिवाजी महाराजांच्या पुतळ्याची प्रतिकृती भेट देऊन गौरव करताना शिवाजी विद्यापीठाचे कुलगुरू डॉ. डी. टी. शिर्के.

 

कोल्हापूर, दि. ३१ मे: शिवाजी विद्यापीठाचा हिरवागार निसर्गरम्य परिसर आणि कोल्हापुरी पाहुणचार यांच्या आम्ही प्रेमात पडलो आहोत, अशी अत्यंत भावनिक प्रतिक्रिया पंजाबच्या विद्यार्थ्यांनी आज येथे व्यक्त केली.

आजादी का अमृतमहोत्सव आणि शिवाजी विद्यापीठाचा हीरक महोत्सव या निमित्ताने 'महाराष्ट्र के रंग, पंजाब के संग, या सांस्कृतिक आदानप्रदान उपक्रमाच्या गौरव समारंभात पंजाबच्या लव्हली प्रोफेशनल विद्यापीठाच्या विद्यार्थ्यांनी ही भावना व्यक्त केली. शिवाजी विद्यापीठाच्या राजमाता जिजाऊसाहेब सभागृहात गेले दोन दिवस सुरू असलेल्या या सांस्कृतिक उपक्रमाचा आज भावपूर्ण समारोप झाला.

पंजाबचा विद्यार्थी नमनसिंह याने या प्रसंगी प्रातिनिधिक भावना व्यक्त केल्या. 'आम्हाला आमच्या लव्हली विद्यापीठाचा परिसर फार मोठा वाटत होता. मात्र, विद्यापीठाचा परिसर कसा असावा, ते शिवाजी विद्यापीठात आल्यानंतर लक्षात आले. इथला परिसर अत्यंत निसर्गसंपन्न व जैवविविधतेने समृध्द आहे. तो अत्यंत भुरळ पाडणारा आहे. त्याशिवाय, कोल्हापुरी पाहुणचार ही सुध्दा प्रेमात पाडणारी गोष्ट आहे. कोल्हापुरी माणसांचे प्रेम आम्ही आमच्या सोबत घेऊन जात आहोत. कोल्हापूरशी आमचा एक कायमस्वरूपी स्नेहबंध निर्माण झालेला आहे.

शिवाजी विद्यापीठाचा विद्यार्थी सुमंत कुलकर्णी यानेही या सांस्कृतिक आदानप्रदान उपक्रमातून पंजाबसोबत मैत्र भावाचे नाते दृढ झाल्याची भावना व्यक्त केली.

यावेळी शिवाजी विद्यापीठाचे कुलगुरू डॉ. डी. टी. शिर्के, प्र-कुलगुरू डॉ. पी. एस. पाटील, लव्हली विद्यापीठाचे अधिष्ठाता प्रा. सौरभ लखनपाल, विद्यार्थी विकास विभागाचे संचालक  डॉ. आर. व्ही. गुरव आणि व्यवस्थापन परिषद सदस्य डॉ. योजना जुगळे यांच्या हस्ते लव्हली प्रोफेशनल विद्यापीठ आणि शिवाजी विद्यापीठातील संघांतील विद्यार्थ्यांना स्मृतिचिन्ह, प्रशस्तीपत्रे देऊन गौरविण्यात आले. त्याचप्रमाणे कुलगुरू डॉ. शिर्के यांच्या हस्ते प्रा. लखनपाल यांना छत्रपती शिवाजी महाराजांच्या अश्वारूढ पुतळयाची प्रतिकृती प्रदान करून सन्मानित करण्यात आले.

शिवाजी विद्यापीठाचा विद्यार्थी केवल यादव याने छत्रपती शिवाजी महाराज यांचे अवघे ४X५ मि.मी. आकाराचे अत्यंत लहान पेंटिंग केले आहे. त्यासाठी त्याचे नाव 'आशिया बुक ऑफ रेकॉर्ड' मध्ये आले आहे. त्याच्या या यशाबद्दल कुलगुरू शिर्के यांच्या हस्ते त्याचा गौरव करण्यात आला.

'ध्यानधारणा करून रम्य परिसराचा आनंद'

पंजाबच्या विद्यार्थ्यांनी आज सकाळी संगीत व नाटयशास्त्र अधिविभागाच्या तलाव परिसरात ध्यानधारणा करून या परिसराचा आनंद सकाळी घेतला. फिरत असताना हे ध्यानधारणेचे हे दृश्य पाहून अतिशय समाधान वाटले, असे कुलगुरू डॉ. डी. टी. शिर्के यांनी यावेळी सांगितले. आपल्या विद्यापीठाचा परिसर हा असा ध्यानधारणा आणि ज्ञानसाधना या दोहोंसाठी उपयुक्त आहे. त्याचा विद्यार्थ्यांनी लाभ घ्यावा, असे आवाहन त्यांनी यावेळी केले. मुंबई विद्यापीठाचे तज्ज्ञ मार्गदर्शक डॉ. नीलेश सावे आणि डॉ. आर.व्ही. गुरव यांनी या उपक्रमाच्या यशस्वितेसाठी घेतलेल्या परिश्रमाबद्दल कुलगुरूंनी त्यांचे कौतुक व अभिनंदन केले.

'पारितोषिकाच्या रकमेचे विद्यार्थ्यांना समान वाटप'

लव्हली प्रोफेशनल विद्यापीठाच्या कुलपतींनी शिवाजी विद्यापीठ संघास जे एक लाख रूपयांचे पारितोषिक दिले होते, त्यामध्ये आणखी भर घालून त्या रकमेचे संघातील सर्व विद्यार्थ्यांना समान वाटप करण्यात येणार असल्याची माहिती विद्यार्थी कल्याण संचालक डॉ. आर. व्ही. गुरव यांनी यावेळी दिली.