महाराष्ट्राच्या लोकधारेने, दिवळी नृत्याने जिंकली मने; लावणी, भांगड्याने चढविला कळस

 

महाराष्ट्राची लोकधारा सादरीकरणातील फुगडी नृत्य

महाराष्ट्राची लोकधारा

दिवळी नृत्य सादर करताना शिवाजी विद्यापीठाच्या विद्यार्थिनी

दिवळी नृत्य सादर करताना शिवाजी विद्यापीठाच्या विद्यार्थिनी

दिवळी नृत्य सादर करताना शिवाजी विद्यापीठाच्या विद्यार्थिनी

‘महाराष्ट्र के रंग, पंजाब के संग’ उपक्रमाचा जल्लोषी समारोप

कोल्हापूर, दि. ३१ मे: गौरव समारंभानंतर झालेल्या सांस्कृतिक कार्यक्रमामध्ये आज शिवाजी विद्यापीठाच्या विद्यार्थ्यांनी सादर केलेले गोव्याचे दिवळी नृत्य (दीपनृत्य) आणि महाराष्ट्राच्या पारंपरिक लोकधारेच्या सादरीकरणाने उपस्थितांची मने जिंकली. आणि अखेरीस सादर झालेल्या महाराष्ट्राची लावणी आणि पंजाबी भांगडा नृत्याने कार्यक्रमाचा परमोच्च बिंदू गाठला. उपस्थितांनी प्रचंड जल्लोषी प्रतिसाद या सादरीकरणास दिला.

आजच्या सांस्कृतिक कार्यक्रमाची सुरवात दिवळी या गोव्याच्या पारंपरिक लोकनृत्याने झाली. शिवाजी विद्यापीठाच्या विद्यार्थिनींनी ते सादर केले. अत्यंत अवघड असा हा नृत्यप्रकार या विद्यार्थिनींनी अत्यंत नजाकतीने सादर केला. त्यानंतर शिवाजी विद्यापीठाच्या विद्यार्थ्यांनी ‘आझादी’ हे प्रहसन (लघुनाटिका) सादर केले. स्वातंत्र्याचा अर्थ आणि महत्त्व त्यांनी याद्वारे अधोरेखित केला.

त्यानंतर लव्हली प्रोफेशनल विद्यापीठाने भारतीय वाद्यवृंद सादर केला. या माध्यमातून त्यांनी महाराष्ट्र व पंजाबसह ईशान्य भारत, पश्चिम बंगाल, आसाम, राजस्थान, गुजरात, ओडिशा आदी राज्यांतील लोकसंगीताच्या विविध छटांचे दर्शन घडविले.

‘महाराष्ट्राची लोकधारा’ या अंतर्गत शिवाजी विद्यापीठाच्या संघाने भूपाळीपासून ते वासुदेव नृत्य, शेतकरी नृत्य, कोकणचे बाल्या नृत्य, मंगळागौर, भारूड, धनगरी नृत्य, वाघ्या-मुरळी, जोगवा, गोंधळ, कोळीनृत्य अशा महाराष्ट्राच्या समृद्ध लोकपरंपरांचे दर्शन घडविले आणि दर्शकांची मने जिंकली. पंजाबच्या संघाने शहीद भगतसिंगांच्या जीवन संदेशावर आधारित एकांकिका सादर केली. प्रतीक सिंह आणि गणेश चिंचकर यांनी अप्रतिम नक्कल सादर केली.

पंजाब व कोल्हापूरच्या विद्यापीठांनी संयुक्तपणे देशभक्तीपर गीतांचा कार्यक्रम सादर केला. या गीतांनी सभागृहातील वातावरण पूर्णतः राष्ट्रभक्तीमय होऊन गेले.

अखेरच्या टप्प्यात या सांस्कृतिक आदानप्रदान उपक्रमाचा कळसाध्याय रचला तो लावणी व भांगडा या नृत्यांनी. उपस्थितांचा प्रचंड जल्लोषी प्रतिसाद या सादरीकरणांना लाभला आणि त्या उत्साहाच्या वातावरणातच या उपक्रमाचा समारोप झाला. डॉ. नीलेश सावे आणि हितेंद्र सिंग यांनी या कार्यक्रमाचे सूत्रसंचालन केले.